मुंबईकरांच्या अपेक्षांच्या गाडीला निराशेचा थांबा!

अपेक्षाभंग
* रेल्वे मानकानुसार प्रत्येक स्थानकावर २ स्वच्छतागृहे व २ मुताऱ्या असणे बंधनकारक आहे. त्यातही रेल्वे स्थानकांवर स्वच्छतागृहांची कमतरता असूनही कोणतीही तरतूद करण्यात आली नाही.
* लोकलमधून पडून वर्षभरात सुमारे ७०० जणांचा मृत्यू झाला. यामुळे हे अपघात रोखण्यासाठी अधिक गाडय़ा सुरू करण्याची तसेच संबंधित उपाययोजना करण्याची अपेक्षा होती. मात्र त्यातही प्रवशांची निराशा झाली आहे.
* प्रवाशांच्या सुरक्षेच्या दृष्टिकोनातून अधिक सीसीटीव्ही कॅमेरे आणि अत्याधुनिक उपाययोजना करणे अपेक्षित होते. वर्षभरात रेल्वेच्या हद्दीत होणाऱ्या गुन्ह्य़ांचे प्रमाण सुमारे दीड हजारांवर आहे.
* प्रत्येक स्थानकावर दोन पाणपोया असणे अपेक्षित आहे. मात्र त्याबाबत उदासीनता दिसून आली आहे.
’ मुंबईकरांसाठी नवीन गाडय़ांसह उपनगरीय गाडय़ांच्या फेऱ्या वाढवणे अपेक्षित होते.
’ रेल्वे रूळ ओलांडताना होणारे अपघात टाळण्यासाठी अनेक स्थानकांवर पादचारी पुलांची संख्या वाढवण्यावर भर दिला जाण्याची अपेक्षा होती.

आमच्या मते..
उपनगरीय प्रवाशांची निराशा
यंदाच्या रेल्वे अर्थसंकल्पातून उपनगरीय रेल्वे प्रवाशांची निराशा झाली आहे. मुंबईसाठी नव्याने कोणतीही ठोस तरतूद करण्यात आली नसून उपनगरीय रेल्वेतील गर्दीवर नियंत्रण मिळवण्यासाठी नव्या लोकल फेऱ्यांची घोषणा होईल अशी आमची अपेक्षा होती, मात्र अशी घोषणाच न झाल्याने प्रवाशांमध्ये नाराजी आहे. कारण, फेऱ्या वाढल्या असत्या तर रेल्वेतून होणाऱ्या अपघातांना आळा बसू शकला असता, पण अर्थसंकल्प मांडताना या महत्त्वाच्या बाबीचा विचारच करण्यात आला नाही. दिव्यात गेल्या २ जानेवारीला झालेल्या आंदोलनानंतर या घटनेची दखल घेत रेल्वे मंत्री स्वत ठाण्याला आले होते. त्यामुळे त्यानंतर दिवा-सीएसटी लोकल सुरू होईल अशी आम्हांला आशा होती. मात्र अशा लोकलचीही घोषणा करण्यात आलेली नाही.
आदेश भगत, दिवा रेल्वे प्रवासी संघटना

जुन्या घोषणांची पूर्तता करा
रेल्वे अर्थसंकल्प मांडताना मी काही जादूगार नाही, त्यामुळे मी स्वप्ने दाखवू शकत नाही. असे रेल्वे मंत्र्यांचे म्हणणे आम्हांला मान्य आहे. मात्र, गेल्या पाच वर्षांपासून ज्या घोषणा करण्यात आल्या होत्या किमान त्यांची तरी पूर्तता करण्यात यावी. आजवर झालेल्या घोषणा जरी पूर्ण झाल्या तरी देखील येथील प्रवाशांना काहीसा दिलासा मिळू शकेल. आमच्या प्रवाशांचे रोजच्या प्रवासात हाल होत असून त्यांचा जीव जात आहे. या प्रवाशांना जीवनदान द्यावे अशी मागणी आता रेल्वे मंत्र्यांकडे करण्याची वेळ आली आहे.
लता अरगडे, उपाध्यक्ष रेल्वे प्रवासी महासंघ

संतुलित रेल्वे अर्थसंकल्प
रेल्वे अर्थसंकल्प संतुलित असून रेल्वेतून होणाऱ्या मृत्यूबद्दल रेल्वे मंत्र्यांनी गांभिर्य व्यक्त केले आहे. महाराष्ट्रातील असूनही देशाला समोर ठेऊन सुरेश प्रभू यांनी अर्थसंकल्प मांडला ही स्वागतार्ह बाब आहे. मात्र, गेल्या संकल्पात एमयुटीपी – २ प्रकल्पाअंतर्गत ७२ रेक्स मिळणार होते. ते मिळाले तर नाहीच मात्र ते कधी मिळणार याचा उल्लेख देखील यंदाच्या अर्थसंकल्पात करण्यात आलेला नाही. यांमुळे मुंबईकर प्रवाश्यांची निराशाच झाली आहे. आम्हांला नवीन स्वप्ने दाखवली नाहीत तरी चालतील मात्र जी यापूर्वी दाखवली आहेत ती साकार होणे हे प्रवाशांच्या दृष्टीने महत्त्वाचे आहे.
सुभाष गुप्ता, अध्यक्ष, यात्री संघ

निराशाजनक संकल्प
यावर्षी रेल्वे मंत्री सुरेश प्रभू यांनी मांडलेला अर्थसंकल्प नैराश्यजनक असून या संकल्पात महाराष्ट्राला ठेंगा दाखविण्यात आला आहे. इतका निराशाजनक अर्थसंकल्प यापूर्वी आमच्या पाहण्यात आलेला नसून महाराष्ट्रातील खासदारांनी याबद्दल आवाज उठविला पाहीजे. कल्याण, कर्जत, कसारा या भागातील प्रवाशांना कोणताच लाभ नाही. रेल्वे अपघातांना आळा बसण्यासाठी ठोस उपाय करण्यात आलेले नाहीत. बुलेट ट्रेनमध्ये प्रवाशांच्या स्वागतासाठी हवाई सुंदऱ्यांसारख्या स्त्रीया सेवेला असणार यांमुळे हा संकल्प केवळ श्रीमंतासाठी आहे की काय असा संशयही येतो.
नंदकुमार देशमुख, अध्यक्ष, ठाणे रेल्वे प्रवासी संघ