बंगालच्या उपसागरात निर्माण झालेले फायलिन चक्रीवादळ पूर्व किनारपट्टीच्या दिशेने सरकत आहे. परिणामी विदर्भातील काही भागात अतिवृष्टी होण्याचा इशारा वेधशाळेकडून देण्यात आला आहे. या वादळाचा मुंबई व परिसरावर विशेष परिणार होणार नसून पुढील २४ तासांत पावसाच्या तुरळक सरी पडतील, असा अंदाज गुरुवारी मुंबई हवामानशास्त्र विभागाने व्यक्त केला. फायलिन चक्रीवादळाची दिशा व वेग पाहता १२ ऑक्टोबर रोजी ते ओडीसा तसेच आंध्र प्रदेशच्या उत्तर भागावर आदळण्याची शक्यता आहे. आग्नेय दिशेकडून आलेल्या वाऱ्यांसोबत आलेल्या बाष्पामुळे विदर्भात काही भागात अतिवृष्टी होण्याचा इशारा देण्यात आला आहे.
