मुंबई : संपूर्ण देशाचे आणि प्रामुख्याने शेतकऱ्यांचे लक्ष लागून राहिलेल्या मोसमी पावसाची आनंद वार्ता भारतीय हवामान विभागाने दिली आहे. प्रशांत महासागरातील एल निनो स्थिती तटस्थ आहे. संपूर्ण मोसमी पावसाच्या काळात एल निनो सक्रीय होण्याची स्थिती नाही. हिंदी महासागरीय द्विध्रुविताही तटस्थ आहे. डिसेंबर – मार्च या काळात युरोशिया आणि हिमालयात बर्फाच्छादित भाग सरासरीपेक्षा कमी राहिला त्यामुळे यंदा सरासरीपेक्षा जास्त १०५ टक्के पाऊस पडण्याचा अंदाज भारतीय हवामान विभागाने वर्तविला आहे.प्रशांत महासागरात ला निना अथवा एल निनो, अशी कोणतीही स्थिती सक्रीय नाही. ला निना नंतरची निष्क्रीय स्थिती निर्माण झाली आहे. संपूर्ण पावसाळ्यात म्हणजे जून ते सप्टेंबर, या चार महिन्यांत एल निनोची स्थिती निर्माण होण्याची शक्यता आहे. तसेच हिंदी महासागरीय द्विध्रुविता ( आयओडी) स्थितीही निष्क्रीय आहे. पावसाळ्यात ती सक्रीय होण्याची स्थिती नाही. तसेच युरोप आणि आशियातील बर्फाच्छादित प्रदेश सरासरीपेक्षा कमी राहिला आहे. बर्फाच्छादित प्रदेश कमी राहिला तर मोसमी पावसाला पोषक स्थिती असते. त्यामुळे देशात यंदा सरासरीपेक्षा जास्त १०५ टक्के पावसाचा अंदाज आहे.
लडाख, ईशान्य भारत, तमिळनाडूत कमी पाऊस
देशात १९७१ ते २०२० च्या तुलनेत सरासरी ८७ सेमी पाऊस पडतो. त्यात पाच टक्क्यांनी वाढ होण्याचा अंदाज आहे. लडाख, ईशान्य भारत आणि तमिळनाडू वगळता देशाच्या अन्य भागात सरासरीपेक्षा जास्त पाऊस पडण्याचा अंदाज. या वेळी पृथ्वी विज्ञान मंत्रालयाचे सचिव एम. रविचंद्रन, भारतीय हवामान विभागाचे महासंचालक मृत्युंजय महापात्रा आणि शास्त्रज्ञ आर. के. जेनामणी उपस्थित होते.
नैऋत्य स्थिती मोसमी पावसाला निष्क्रीय फायदेशीर
प्रशांत महासागरातील ला निना स्थिती नैऋत्य मोसमी पावसाला पोषक असते. ला निना सक्रीय असताना सामान्यपणे भारतीय उपखंडात सरासरी इतका किंवा काहीसा जास्त पाऊस पडतो. एल निनो स्थिती प्रतिकूल असते. एल निनो सक्रीय असताना सामान्यपणे सरासरीपेक्षा कमी पाऊस पडतो. यंदा प्रशांत महासागरात निष्क्रीय स्थिती असणार आहे. त्यामुळे नैऋत्य मोसमी पावसाची स्थिती सामान्य राहील किंवा सरासरी इतका पाऊस पडेल, असा अंदाज बांधला जात आहे. हिंदी महासागर द्विध्रुविता ही तटस्थ राहणार आहे. ही तटस्था मोसमी पावसाच्या पथ्यावर पडणार आहे. हवामान विभागाने आज जाहीर केलेल्या अधिकृत अंदाजानुसार निष्क्रीय स्थिती फायदेशीर ठरून सरासरीपेक्षा जास्त पाऊस पडण्याचा अंदाज आहे
