लोकसत्ता प्रतिनिधी
मुंबई: गेली आठ वर्षे फरार असलेल्या एका सराईत आरोपीला आरसीएफ पोलिसांनी पाठलाग करून अटक केली. शरीफ शेख (२९) असे या आरोपीचे नाव असून तो मानखुर्दच्या लल्लूभाई कंपाऊंड परिसरात वास्तव्यास होता.
आरसीएफ पोलिसांनी २०१६ मधील एका दरोड्याच्या गुन्ह्यात या आरोपीविरोधात गुन्हा दाखल केला होता. मात्र हा आरोपी पोलिसांना सापडत नव्हता. हा आरोपी शुक्रवारी चेंबूरमधील रामटेकडी परिसरात येणार असल्याची माहिती आरसीएफ पोलीस ठाण्याचे सहाय्यक पोलीस निरीक्षक किरण मांढरे यांना मिळाली. त्यांनी तत्काळ पथकासह घटनास्थळी धाव घेतली. पोलिसांना पाहताच आरोपीने पळून जाण्याचा प्रयत्न केला.
हेही वाचा… सीआयएसएफ जवानाच्या रायफलचे मॅगझीन गायब
मात्र पोलिसांनी पाठलाग करून आरोपीला मानखुर्द परिसरात अटक केली. अटक आरोपी सराईत गुन्हेगार असून त्याच्याविरोधात शहरातील विविध पोलीस ठाण्यांत १० गंभीर गुन्हे दाखल असल्याची माहिती पोलिसांनी दिली.
