लोकसत्ता प्रतिनिधी मुंबई: मुंबई महानगरपालिकेने कुर्ला रेल्वे स्थानकाजवळील गांधी मैदानातील विकास कामांना नुकतीच सुरुवात केली असून येत्या वर्षभरात ही विकास कामे पूर्ण होतील असा दावा मुंबई महानगरपालिकेच्या अधिकाऱ्यांनी केला आहे. त्यानंतर कुर्लावासीयांना एक उद्यान उपलब्ध होणार आहे. कुर्ला रेल्वे स्थानकाच्या पश्चिमेला असलेल्या एस. जी. बर्वे मार्गावरील गांधी मैदानाचा विकास करण्यात येणार आहे. ३५ हजार चौरस मीटर क्षेत्रफळाच्या या मैदानात सर्व सोयी-सुविधा उपलब्ध करण्यात येणार आहेत. कुर्ला रेल्वे स्थानकालगतच्या बस आगाराच्या पाठीमागे असलेला हा भूखंड जिल्हाधिकाऱ्यांच्या अखत्यारीत होता. देखभालीअभावी तेथे अतिक्रमण झाले होते. गांधी मैदान अतिक्रमणमुक्त करण्यासाठी कुर्ला येथील नागरिकांनी पाठपुरावा केला होता. त्यानंतर हा भूखंड महानगरपालिकेकडे हस्तांतरित करण्यात आला होता. आता या मैदानाचे सुशोभिकरण आणि विकास करण्यात येणार आहे. आणखी वाचा- म्हाडा कोकण मंडळ सोडत २०२३: अर्ज करण्यासाठी अखेरचे दोन दिवस, आतापर्यंत २८ हजार अर्ज सादर या उद्यानात सुशोभीकरणासोबतच पदपथ, संरक्षक भिंत, संरक्षक जाळ्या, बैठक व्यवस्था, पर्जन्य जलवाहिन्या, स्वच्छतागृह, दिव्यांची रोषणाई, कचरपेटी, हिरवळ आदी कामे करण्यात येणार आहे. तसेच क्रिकेट, कबड्डी, व्हॉलीबॉल, मल्लखांब, कुस्ती अशा खेळांसाठीही तेथे व्यवस्था करण्यात येणार आहे. ११ महिन्यांत मैदानाचा विकास करण्यात येणार आहे.
