मुंबई : नववर्षाच्या स्वागतासाठी अनेक नागरिक समुद्रकिनारी, प्रेक्षणीय स्थळी भेटी देतात. त्यामुळे नियमित प्रवाशांसह सुट्टीनिमित्त घराबाहेर पडलेल्यांची संख्या अधिक असते. मध्य रेल्वेवरील प्रमुख रेल्वे स्थानकांत गर्दीचा भार वाढतो. वर्षाच्या अखेरीस होणारी प्रवाशांची गर्दी विभाजित करण्यासाठी महाराष्ट्रातील १३ आणि कर्नाटकातील एका रेल्वे स्थानकात फलाट तिकीट विक्री बंद करण्याचा निर्णय मध्य रेल्वेने घेतला आहे. २ जानेवारीपासून पुन्हा फलाट तिकीट विक्री सुरू होईल, असे मध्य रेल्वेने सांगितले.
मुंबईसह राज्यातील विविध पर्यटनस्थळी वर्षअखेरच्या कालावधीत पर्यटकांची प्रचंड वर्दळ सुरू आहे. बहुसंख्य प्रवासी प्रवास करताना रेल्वेसेवाचा वापर केला जातोय. गर्दीचा लोंढा वाढून प्रवाशांची धक्काबुक्की होऊन, त्याचे स्वरूप चेंगराचेंगरीसारखे होऊ शकते. अशा घटना टाळण्यासाठी प्रमुख रेल्वे स्थानकात प्रवाशांच्या गर्दीचे नियोजन करण्यासाठी सुरक्षा व्यवस्थेचा चोख बंदोबस्त केला आहे. यासह रेल्वे स्थानकात येणारी अतिरिक्त गर्दी रोखण्यासाठी, प्रवाशांच्या गर्दीचे व्यवस्थापन करण्यासाठी मध्य रेल्वेने प्रमुख स्थानकांवर फलाट तिकिटांच्या विक्रीवर तात्पुरते निर्बंध आणले आहेत.
हेही वाचा – प्रवाशांची आर्थिक कोंडी, खासगी वाहतूकदारांकडून बसभाड्यात वाढ
वृद्ध, रुग्ण, महिलांना सूट
वयोवृद्ध, ज्येष्ठ नागरिक, रुग्ण, लहान मुले, निरक्षर व्यक्ती आणि महिला प्रवासी ज्यांना एकट्याने प्रवास करता येत नाही, अशा प्रवाशांचा प्रवास सोयीस्कर होण्यासाठी त्यांना फलाट विक्री निर्बंधांमधून सूट दिली आहे. त्यामुळे त्यांना फलाट तिकीट विकत घेता येणे शक्य होणार आहे. वर्षअखेरीच्या कालावधीत सुरळीत व सुरक्षित प्रवास अनुभवासाठी प्रवाशांनी त्यानुसार नियोजन करावे. नियमांचे पालन करावे, असे आवाहन मध्य रेल्वे प्रशासनाद्वारे केले आहे.
हेही वाचा – मुंबई : मालाड येथे १० वर्षांच्या मुलाची आत्महत्या
कोणत्या स्थानकांवर फलाट तिकीट विक्री बंद
● मध्य रेल्वेने राज्यातील १३ आणि कर्नाटकातील एका स्थानकावर फलाट तिकीट विक्री बंद करण्याचे जाहीर केले आहे.
● छत्रपती शिवाजी महाराज टर्मिनस (सीएसएमटी), दादर, लोकमान्य टिळक टर्मिनस (एलटीटी), ठाणे, कल्याण, पनवेल, पुणे, नागपूर, नाशिक रोड, भुसावळ, अकोला, सोलापूर, लातूर आणि कर्नाटकातील कलबुर्गी येथे फलाट तिकीट मिळणार नाही.
