लोकसत्ता खास प्रतिनिधी मुंबई : पाच तरूणींचा विनयभंग केल्याच्या आरोपाखाली २५ वर्षीय रिक्षा चालकाला शनिवारी पोलिसांनी अटक केली. पीडितांमध्ये दोन अल्पवयीन मुलींचा समावेश आहे. १५ वर्षीय मुलीच्या तक्रारीवरून याप्रकरणी विनयभंग व बालकांचे लैंगिक अपराधापासून संरक्षण कायद्याअंतर्गत गुन्हा दाखल करण्यात आला आहे. इतर चार पीडितांचाही आरोपीने विनयभंग केल्याचा आरोप आहे. रोहित भोसले (२५) असे अटक आरोपीचे नाव आसून तो कांदिवली पूर्व येथील रहिवासी आहे. पीडित तरूणी शिकवणीवरून शुक्रवारी घरी जात होती. त्यावेळी कांदिवली पूर्वी येथील एव्हरशाईन क्राऊन इमारतीसमोर एक रिक्षाचालक वेडीवाकडी वळणे घेत रिक्षा चालवत होता. त्याने अचानक पीडित मुलीच्या शेजारी रिक्षा थांबवली आणि तिचा विनयभंग केला. दुपारी २ ते ७ यादरम्यान आरोपीने रिक्षातून जाताना आणखी चार तरूणींबरोबर गैरप्रकार केले. त्यात १७, २७, २६ व १९ वर्षांच्या तरूणींचा समावेश आहे. आणखी वाचा-मुंबई : विमानात बॉम्बच्या धमकीची चिठ्ठी, सहारा पोलीस ठाण्यात गुन्हा दाखल याप्रकरणी १५ वर्षीय पीडित मुलीने समता नगर पोलिसांकडे तक्रार केली असता पोलिसांनी विनयभंग व पोक्सो कायद्याअंतर्गत गुन्हा दाखल केला. त्यानंतर सीसी टीव्ही कॅमेऱ्यातील चित्रणाच्या मदतीने आरोपीचा शोध घेऊन रात्री उशीरा भोसलेला अटक करण्यात आली. चौकशीत आरोपीने दारूच्या नशेत हे कृत्य केल्याचे सांगितले. आरोपीविरोधात यापूर्वी कोणताही गुन्हा दाखल नसल्याचे अधिकाऱ्याने सांगितले. याप्रकरणी पोलीस अधिक तपास करीत आहेत.
