सैफ हल्ला प्रकरण : आरोपीचा चेहऱ्याच्या पडताळणीचा अहवाल पोलिसांना प्राप्त, न्यायवैद्यक प्रयोगशाळेचा अहवाल

आरोपी १६ जानेवारी रोजी इमारतीमधील जिन्यावरून चढून वर आला आणि सैफचा धाकटा मुलगा जहांगीरच्या खोलीतील शौचालयाच्या खिडकीतून घरात शिरला. घरात शिरलेल्या अनोळखी व्यक्तीला पाहून सैफ अली खानच्या घरात काम करणारी महिला नर्स एरियामा फिलिप्स ऊर्फ लिमा जहांगीरला उचण्यासाठी धावल्या. त्यावेळी आरोपीने त्यांच्यावर चाकूने हल्ला केला. त्याचवेळी सैफ अली खान आणि करिना दोघेही तेथे पोहोचले. हल्लेखोराने चाकूने सैफवर हल्ला केला. तैमुरची आया गीता मध्ये पडल्या. आरोपीने केलेल्या हल्ल्यात त्याही जखमी झाल्या. आरोपीला १९ जानेवारी रोजी ठाण्यातील लेबर कॅम्प परिसरातून अटक करण्यात आली होती.

सैफच्या इमारतीमधील सीसीटीव्हीत हल्ल्याच्या दिवशी आरोपीचे चित्रीकरण झाले होते. याप्रकरणी आरोपीचा चेहरा व अटक आरोपीचा चेहरा यात तफावत असल्याचे आरोप करण्यात येत होते. त्यामुळे पोलिसांनी याप्रकरणी न्यायवैद्यक प्रयोगशाळेच्या मदतीने आरोपीची फेस रेकगनाझेशन चाचणी करण्याचा निर्णय घेतला होता. त्याअंतर्गत सीसीटीव्हीतील आरोपीचा चेहरा व अटक आरोपीचे छायाचित्र यांची तंत्रज्ञानाच्या मदतीने पडताळणी करण्यात आली. त्यात दोन्ही व्यक्ती एकच असल्याचे स्पष्ट झाले. याबाबत वरिष्ठ अधिकाऱ्यांना विचारणा केली असता त्यांनी या वृत्तास दुजोरा दिला. सध्या आरोपी न्यायालयीन कोठडीत आहे.