Sanjay Raut : “महायुतीला जिंकवण्यासाठी पोलीस व गुंडांच्या बैठका”, राऊतांचे आरोप; यादी देण्यास तयार, वरिष्ठ अधिकाऱ्याला म्हणाले, “सरकार बदलल्यावर…”

संजय राऊत म्हणाले, वरिष्ठ पोलीस अधिकारी आणि गुंडांच्या बैठका होतात. वरिष्ठ पोलीस अधिकारी, आयपीएस दर्जाचे अधिकारी व या गुंडांच्या विविध मतदारसंघांत बैठका होत आहेत. निवडणुका जिंकून देण्यासाठी रात्री बैठका होतात. आम्ही निवडणूक आयोगला यासंदर्भात माहिती देणार आहोत. हे पोलीस महाविकास आघाडीला मदत करणारे कार्यकर्ते, तसेच ज्यांच्यावर राजकीय गुन्हे आहेत त्यांना तडीपार करतात. त्यांच्यावर खोटे गुन्हे दाखल करायचे, त्यांच्याकडे पोलिसांना पाठवायचं, त्यांच्या घरी किंवा गावी कोण आहे याचा शोध घ्यायचा, त्यांना धमक्या द्यायच्या, असे सगळे पराक्रम चालू आहेत.

हे ही वाचा >> अमित शाहांकडून फडणवीसांना मुख्यमंत्री बनवण्याचे संकेत? बावनकुळे म्हणाले, “मी वारंवार सांगतोय, महाराष्ट्रात…”

थेट वरिष्ठ पोलीस अधिकाऱ्याचं नाव घेत म्हणाले…

शिवसेना (ठाकरे) खासदार म्हणाले, कायदा व सुव्यवस्था सांभाळणाऱ्या प्रमुख पोलीस अधिकाऱ्यांना माझं आव्हान आहे की तुम्ही एक गोष्ट लक्षात घ्या, सरकार बदलत असतं, सरकार जातं, येतं. गुडांच्या मदतीने तुम्ही ज्या कोणाला मदत करू इच्छिता त्यांचेही दिवस फिरतील. तुम्ही पोलीस खात्याला कलंक लावत आहात. मुंबई आणि महाराष्ट्राचं पोलीस खातं तुम्ही बेआब्रू करत आहात. सत्यनारायण चौधरी, तुम्ही कायदा व सुव्यवस्था विभागाचे प्रमुख आहात, मात्र, तुमच्यासमोर काय जळतंय ते पाहा, आम्हाला जास्त बोलायला लावू नका. सरकार बदलत आहे हे लक्षात घ्या. सर्वांचा हिशेब केला जाईल. माझ्याकडे यादी मागितली तर मी गुंडांची यादी द्यायला तयार आहे. कोणत्या अधिकाऱ्याच्या कोणत्या गुंडाबरोबर बैठका होतायत, वर्षा बंगल्यावरून कोणत्या सूचना दिल्या जातायत ते मी सांगू शकतो. सत्यनारायण चौधरी कोणासाठी काम करतायत त्यांची नावं मी देऊ का? मला धमक्या देऊ नका, एवढंच सांगतो.