पंकज भुजबळ यांना दिलासा देण्यास सुप्रीम कोर्टाचा नकार, अटक अटळ

महाराष्ट्र सदन घोटाळ्यासह कोटय़वधींच्या आर्थिक गैरव्यवहारांच्या आरोपांप्रकरणी अटकेत असलेले माजी उपमुख्यमंत्री छगन भुजबळ यांचे पुत्र पंकज भुजबळ यांच्यापुढील अडचणी आणखी वाढल्या आहेत. पंकज भुजबळ यांच्याविरोधात बजावण्यात आलेल्या अजामीनपात्र अटक वॉरंटला स्थगिती देण्यास सर्वोच्च न्यायालयाने बुधवारी नकार दिला. आर्थिक गैरव्यवहार प्रतिबंधक कायद्यांतर्गत (पीएमएलए) विशेष न्यायालयाने पंकज यांच्याविरोधात अजामीनपात्र अटक वॉरंट बजावले आहे. त्याविरोधात त्यांनी सर्वोच्च न्यायालयात दाद मागितली होती. पण न्यायालयाने त्यांना दिलासा देण्यास नकार दिल्यामुळे त्यांची अटक अटळ आहे.