मुंबई: गाडीत एकटीच असलेल्या विद्यार्थिनीला मोबाइलमध्ये अश्लिल व्हिडीओ दाखवून स्कुल व्हॅन चालकाने तिचा विनयभंग केल्याचा प्रकार चेंबूर परिसरात घडला. याबाबत विद्यार्थिनीच्या आईने केलेल्या तक्रारीवरून टिळकनगर पोलिसांनी आरोपी चालकाला अटक केली असून याप्रकरणी पोलीस अधिक तपास करीत आहेत.
चेंबूरच्या टिळकनगर परिसरात १९ ऑक्टोबर रोजी ही घटना घडली. पीडित ११ वर्षांची मुलगी परिसरातील एका शाळेत इयत्ता पाचवीत शिकते. १९ ऑक्टोबर रोजी शाळेतून घरी येत असताना ती स्कुल व्हॅनमध्ये एकटीच होती. हीच संधी साधून आरोपी तुषार भालेरावने गाडी लोकमान्य टिळक टर्मिनस परिसरात उभी केली आणि मुलीला मोबाइलमध्ये अश्लील व्हिडीओ दाखवत तिचा विनयभंग केला. मुलीने आरडाओरडा केल्यानंतर आरोपीने तिला धमकावले आणि तिला तिच्या घराजवळ सोडले.
हेही वाचा… मुंबई : गिरगावातील खोताची वाडी येथे प्रशस्त अभ्यासिका सुरु
या प्रकारानंतर पीडित मुलगी प्रचंड घाबरली होती. आईने विचारपूस केल्यानंतरही मुलगी काहीच सांगण्याच्या मनस्थितीत नव्हती. मात्र आईने तिला विश्वासात घेतल्यानंतर तिने घडलेला प्रकार सांगितला. तिच्या आईने बुधवारी याबाबत टिळकनगर पोलीस ठाण्यात तक्रार दाखल केल्यानंतर पोलिसांनी गुन्हा दाखल करून आरोपीला अटक केली.
