किनारे सज्ज

अनंतचतुर्दशीला शहरातील  विविध ठिकाणी ४५ हजारहून अधिक गणेशमूर्तीचे विसर्जन होणार आहे. यामध्ये १२ हजार सार्वजनिक मंडळांच्या मूर्तीचा समावेश आहे. गणरायाच्या विसर्जनासाठी किनारे तसेच तलावांवर विशेष व्यवस्था करण्यात आली असून सुरक्षेचीही खबरदारी घेण्यात आली आहे.
आतापर्यंत दीड दिवस, पाच दिवस व सात दिवसाच्या एक लाख ६५ हजार ४१७ गणेशमूर्तींचे विसर्जन झाले आहे. गेल्या वर्षी एक लाख ९९ हजार मूर्तींचे विसर्जन करण्यात आले होते व त्यातील ४२,६६० गणेशमूर्तीचे अनंतचतुर्दशीला विसर्जन करण्यात आले. त्यापैकी  ११,८५३ सार्वजनिक मूर्ती होत्या. यावेळी मूर्तीच्या संख्येत थोडी वाढ अपेक्षित आहे.
मुंबईत ७२ विसर्जन स्थळांपैकी २७ समुद्रकिनारे आहेत. याशिवाय २७ कृत्रिम तलावांची व्यवस्था करण्यात आली आहे. गिरगाव चौपाटी, जुहू चौपाटी, सागर कुटीर व मार्वे चौपाटी येथे वाहने रुतू नयेत यासाठी लोखंडी फळ्या टाकण्यात आल्या आहेत. त्याचप्रमाणे गिरगाव चौपाटीवर मोठय़ा संख्येने येत असलेल्या मूर्तीच्या विसर्जनासाठी अतिरिक्त दोन तराफे व दोन बोटी यांची व्यवस्था करण्यात आली आहे. महानगरपालिकेकडून २४० जीवरक्षकांची नेमणूक करण्यात आली असून नौदल, मुंबई पोर्ट ट्रस्ट तसेच सामाजिक संस्थांचीही मदत घेण्यात येणार आहे. प्रथमोपचार केंद्र, रुग्णवाहिका, जीवनावश्यक औषधांची व्यवस्था करण्यात आली आहे. गिरगाव चौपाटीवर स्टिंग रे किंवा जेली फिश यांच्यामुळे घडलेल्या घटना लक्षात घेऊन विशेष प्रथमोपचार सोयी देण्यात आल्या आहेत. कृत्रिम तलावांमध्ये अधिकाधिक मूर्तीचे विसर्जन करून पर्यावरण स्वच्छ राखण्यास मदत करावी, असे आवाहन पालिकेने केले आहे. निर्माल्य टाकण्यासाठी निर्माल्यकलशांचा वापर करावा, मोठय़ा आवाजात ध्वनिक्षेपक लावू नयेत, विसर्जनी दिनी मद्यपान करू नये व आपत्कालीन परिस्थितीत भक्तांनी सैरावैरा पळू नये, असे आवाहन पालिकेने केले आहेत.