मुंबई : कांदिवली पूर्व येथे मित्र-मैत्रिणींसह खेळत असलेल्या चार वर्षांच्या मुलीवर लैंगिक अत्याचार केल्याच्या आरोपाखाली सभागृहाच्या सुरक्षा रक्षकाला समता नगर पोलिसांनी शुक्रवारी अटक केली. आरोपीविरोधात लैंगिक अत्याचार व बालकांचे लैंगिक अत्याचारापासून संरक्षण (पोक्सो) कायद्याअंतर्गत गुन्हा दाखल करण्यात आला आहे. मुलीने हातवारे करून हा संपूर्ण प्रकार आईला सांगितला. त्यानंतर पोलिसांनी याप्रकरणी गुन्हा दाखल केला. याप्रकरणी समता नगर पोलीस अधिक तपास करीत आहेत.

पीडित मुलगी बुधवारी सायंकाळी परिसरातील एका सभागृहामध्ये मित्र-मैत्रिणींसोबत खेळत होती. त्यावेळी तेथे सुरक्षा रक्षक म्हणून काम करणाऱ्या ५० वर्षीय आरोपीने पीडित मुलीला जवळ बोलावले. त्यानंतर तिला मांडीवर बसवून अत्याचार केला. आरोपीने पीडित मुलगी लहान असल्याचा फायदा घेऊन तिच्यासोबत अश्लील कृत्य केले.

पीडित मुलगी घरी गेली असता सुरक्षा रक्षकाने तिच्यासोबत केलेल्या कृत्याबाबत सांगितले. त्यामुळे पीडित मुलीच्या आईने याप्रकरणी समता नगर पोलिसांकडे तक्रार केली. पोलिसांनी याप्रकरणी भारतीय न्याय संहिता कलम ६४ (२), ६५ (२) व पोक्सो कायदा कलम ६, १० अंतर्गत गुन्हा दाखल केला. त्यानंतर पोलिसांनी आरोपीच्या अटकेसाठी एक पथक तो राहत असलेल्या परिसरात पाठवले. तेथून गुरूवारी पहाटे त्याला अटक करण्यात आली. आरोपीविरोधात यापूर्वी कोणताही गुन्हा दाखल नसून याप्रकरणी समता नगर पोलीस अधिक तपास करीत आहेत.

अल्पवयीन मुलांविरोधात घडलेल्या गुन्ह्यांमध्ये वाढ

मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.

२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याचे प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घटनांमध्ये बहुसंख्य आरोपी परिचित व्यक्ती आहेत.