कल्याण पोलीस उपायुक्त कार्यालयाच्या आवारात स्फोटके सापडल्याने खळबळ

कल्याण पश्चिमेतील खडकपाडा परिसरात एका इमारतीमध्ये तीन महत्वाची शासकीय कार्यालये आहेत. या इमारतीच्या तळ मजल्यावर पोलीस उपायुक्त कार्यलय, पहिल्या मजल्यावर निवडणूक कार्यलय, दुसऱ्या मजल्यावर प्रांत कार्यालय आहे. अशा महत्वाच्या इमारतीच्या आवारातच स्फोटके सापडल्याने एकच खळबळ उडाली.

पोलिसांच्या माहितीनुसार, अंबरनाथ तालुक्यातील वसाद गावात राहणाऱ्या तीन शेतकरी महिला जमिनीच्या वादप्रकरणी प्रांत कार्यलयात आल्या होत्या. या महिला ज्या रिक्षातून आल्या होत्या त्याच रिक्षात ही स्फोटके आढळली आहेत. त्यामुळे या महिलांनी रिक्षा चालकाला फसविण्यासाठी ही स्फोटके रिक्षात ठेवल्याचा प्राथमिक अंदाज पोलिसांनी व्यक्त केला आहे. खडकपाडा पोलिसांनी ही स्फोटके जप्त करीत पुढील तपास सुरु केला आहे.