ठाकरे गटाचे खासदार संजय राऊत यांनी आज कोल्हापुरात एक आक्षेपार्ह विधान केलं आहे. राज्यातील विधीमंडळ हे चोरमंडळ आहे, अशा आशयाचं विधान संजय राऊतांनी केलं. राऊतांच्या या विधानानंतर विधानसभेच्या अर्थसंकल्पीय अधिवेशनात एकच गदारोळ झाला. भारतीय जनता पार्टीच्या सदस्यांनी संजय राऊतांवर हक्कभंगाचा प्रस्ताव आणला आहे. यानंतर विधानसभा अध्यक्षांनी विधिमंडळाचं आजचं कामकाज तहकूब केलं.
या घडामोडीनंतर शिंदे गटाचे आमदार शहाजीबापू पाटील यांनी संजय राऊतांवर खोचक टीका केली आहे. संजय राऊत हे आगलावे आहेत. ते टेंभा घेऊन महाराष्ट्रात आग लावत फिरतात, अशी टीका शहाजीबापू पाटील यांनी केली. ते मुंबई येथे पत्रकारांशी बोलत होते.
हेही वाचा- “संजय राऊत डाकू आहे डाकू, त्याच्यावर…”, थेट शिवी देत संतोष बांगरांची संतप्त प्रतिक्रिया
संजय राऊतांच्या विधानाबाबत विचारलं असता शहाजीबापू पाटील म्हणाले, “संजय राऊत हे आगलावे आहेत. महाराष्ट्रात टेंभा घेऊन आग लावत हिंडणारं हे एक कार्टं आहे, त्याच्याकडे लक्ष देऊ नका.” अशा शब्दांत शहाजीबापू पाटलांनी टीकास्त्र सोडलं.
हेही वाचा- “डान्सबारचे अध्यक्ष शेट्टींप्रमाणे संजय राऊतांना शिक्षा द्यावी”, गुलाबराव पाटलांची मागणी
दरम्यान, ठाकरे गटाचे आमदार आणि संजय राऊत यांचे धाकटे बंधू सुनील राऊत यांनी संजय राऊतांच्या विधानाचं समर्थन केलं आहे. याबाबत विचारलं असता शहाजीबापू पाटील म्हणाले, “एकाच आई-बापाची दोन पोरं सारखीच आसतात. ते काळू बाळू आहेत.”
