पार्थ पवारांच्या उमेदवारीला शरद पवारांकडून ब्रेक? अजित पवारांचे मौन

एबीपी माझा वृत्तवाहिनीने हे वृत्त दिले आहे. शरद पवारांच्या या भूमिकेवर अजित पवारांनी अजून तरी कुठलीही प्रतिक्रिया व्यक्त केलेली नाही. मावळ लोकसभा मतदारसंघाच्या जागेसाठी पार्थ पवार यांच्या नावाची मागच्या दोन-तीन दिवसांपासून जोरदार चर्चा सुरु होती. मागच्या काही वर्षात झालेल्या निवडणूकांमध्ये राष्ट्रवादी काँग्रेसला पुण्यातील हा मतदारसंघ जिंकता आलेला नाही. त्यामुळे राष्ट्रवादी काँग्रेस या मतदारसंघातून अजित पवारांचे सुपूत्र पार्थ पवार यांना निवडणूक रिंगणात उतरवेल अशी चर्चा होती.

पण आता शरद पवारांनीच या चर्चांना ब्रेक लावला आहे. मावळमधून लक्ष्मण जगताप निवडणूक लढवण्यास इच्छुक आहेत. पुढच्यावर्षी होणाऱ्या लोकसभा निवडणुकीच्या तयारीसाठी मुंबईत राष्ट्रवादी काँग्रेसची बैठक सुरु आहे. महाराष्ट्रात लोकसभेच्या ४८ जागा आहेत. त्यातील किती जागांची मागणी करायची. मित्र पक्षांना आघाडीत कसे सामावून घ्यायचे यावर या बैठकीत विचारमंथन सुरु आहे. स्वत:हा शरद पवारांनी आपण निवडणूक लढवणार नसल्याचे म्हटले आहे.