इंद्राणी मुखर्जीच्या ड्रायव्हरला माफीचा साक्षीदार म्हणून स्विकारण्यास सीबीआय तयार

बहुचर्चित शीना बोरा हत्याकांडातील आरोपी आणि इंद्राणी मुखर्जीचा माजी वाहन चालक श्यामवर राय याला माफीचा साक्षीदार करण्यास कोणतीही हरकत नसल्याचे सीबीआयने सोमवारी मुंबई उच्च न्यायालयाला सांगितले. श्यामवर राय याने मे महिन्यात माफीचा साक्षीदार होण्यासाठी याचिका दाखल केली होती. मात्र, सीबीआयने या याचिकेवर विचार करण्यासाठी न्यायालयाकडून वेळ मागून घेतला होता. अखेर आज सीबीआयने श्यामवर रायला माफीचा साक्षीदार करवून घेण्यास तयार असल्याचे सांगितले. यापूर्वी १० मे रोजी श्यामवर रायला न्यायालयात हजर करण्यात आले होते. त्यावेळी या हत्याकांडाबाबत सगळे खरे सांगायचे आहे, असा दावा करत माफीचा साक्षीदार बनण्याची इच्छा श्यामवर रायने विशेष न्यायालयासमोर व्यक्त केली होती.