मुंबई : शिवडी-वरळी उन्नत रस्ता प्रकल्पाच्या कामाला मुंबई महानगर प्रदेश विकास प्राधिकरणाने (एमएमआरडीए) वेग दिला आहे. त्यानुसार कामातील एक एक महत्त्वाचा टप्पा पार करण्यात येत असून असाच एक महत्त्वाचा टप्पा पूर्ण करण्यात आला आहे. या प्रकल्पातील मोठ्या पाईल कॅप्सपैकी ए.डी. मार्ग येथील एका पाईल कॅप्सचे काम नुकतेच यशस्वीपणे पूर्ण करण्यात आले.
१२.५ मी × ५.७ मी × २.५ मी च्या पाईल कॅपमध्ये एकूण १८० क्यू.मी. काँक्रिट वापरण्यात आले. तर हे आव्हानात्मक काम सलग १० तासांत पूर्ण करण्यात आले आहे. अशाच प्रकारे आता पुढील पाईल कॅप्सचे काम पूर्ण केले जाणार आहे.दरम्यान आतापर्यंत या प्रकल्पाचे अंदाजे २९ टक्के काम पूर्ण झाले असून उर्वरित काम जानेवारी २०२४ पर्यंत पूर्ण करण्याचे एमएमआरडीएचे नियोजन आहे. हा उन्नत रस्ता पूर्ण झाल्यास दक्षिण मुंबईतून मुंबई पारबंदर प्रकल्पावर अर्थात शिवडी-न्हावा शेवा सागरी सेतूवर पोहचणे सोपे होणार आहे.
