शिवसेना खासदार संजय राऊत १०० दिवसांहून अधिक काळ तुरुंगात होते. अखेर त्यांना बुधवारी (९ नोव्हेंबर) जामीन मिळाला आणि ते तुरुंगातून बाहेर आले. गुरुवारी (१० नोव्हेंबर) त्यांनी मातोश्रीवर जाऊन उद्धव ठाकरेंची भेट घेतली आणि नंतर पत्रकार परिषदही घेतली. यावेळी राऊतांनी तुरुंगात दोन पुस्तकं लिहिल्याची माहिती दिली. तसेच ते लवकरच प्रकाशित होतील, असंही नमूद केलं. या निमित्ताने या पुस्तकात नेमकं काय असणार याविषयी उत्सुकता निर्माण झालीय. त्यावर स्वतः संजय राऊतांनीच उत्तर दिलं.
तुरुंगातील दिवसांमध्ये आलेल्या अनुभवावर पुस्तक येणार का? यावर संजय राऊत म्हणाले, “माझं पुस्तक तयार झालं आहे. हे अनुभव असतात हे लोकांपर्यंत पोहचवायचे असतात. मी तुरुंगात दोन पुस्तकं लिहिली आहेत. मी लिहिणारा माणूस आहे. त्यामुळे मी वेळेचे सदुपयोग केला. मी तुरुंगात सतत वाचण्याचा प्रयत्न करत होतो.”
“डायरीतील गोष्टींचं पुस्तक काढावं असं मला वाटतं”
“पुस्तक किंवा वर्तमानपत्रातील जे जे वाचलं त्यातील आवडलेल्या आणि लोकांपर्यंत गेल्या पाहिजे अशा गोष्टी मी माझ्या डायरीत लिहून ठेवल्या आहेत. त्या डायरीतील गोष्टींचं पुस्तक काढावं आणि ते लोकांपर्यंत पोहचावं असं मला वाटतं. हल्ली लोकांचं वाचन कमी झालं आहे. अशा अनेक गोष्टी आहेत ज्या हल्लीची मुलं वाचत नाहीत. तरुण लोक वाचत नाहीत,” असं मत संजय राऊतांनी व्यक्त केलं.
“मी इतिहासातील काही नवीन माहिती वाचली. काही राजकीय माहिती किंवा इतर घडामोडींबाबत वाचलं,” असंही राऊतांनी नमूद केलं.
“त्या बातमीने माझं लक्ष वेधून घेतलं”
संजय राऊत पुढे म्हणाले, “तुरुंगात असताना मी एक सुंदर बातमी वाचली. मला त्या बातमीची गंमत वाटली. केरळमध्ये एका मंदिरात एक शाकाहरी मगर होती. तिचा मृत्यू झाला. मगर शाकाहरी नसते. अनेक वर्षे ही मगर लोक देतील त्या प्रसादावर जगली. त्या मगरीचा मृत्यू झाला. त्यानंतर मंदिर व्यवस्थापन आणि संपूर्ण गावाने या मगरीची अंत्ययात्रा काढली आणि हिंदू पद्धतीने अंत्यसंस्कार केले. त्या बातमीने माझं लक्ष वेधून घेतलं.”
हेही वाचा : संजय राऊतांच्या जामिनानंतर उद्धव ठाकरेंची पहिली प्रतिक्रिया, म्हणाले, “पाळीव प्राण्याप्रमाणे…”
ईडी कारवाईवर पुस्तक लिहिणार का? राऊत म्हणाले…
“अशा अनेक बातम्यांची मी टिपणं केली आहेत. त्या टिपणांचं पुस्तक यावं असं मला वाटतं. ते येईल,” असंही संजय राऊतांनी नमूद केलं. ईडीची कारवाई, तुरुंगात भेटलेल्या व्यक्ती अशा विषयावर पुस्तक लिहिणार का या प्रश्नावर मात्र संजय राऊतांनी उत्तर देणं टाळलं.
