मुंबई : मध्य रेल्वे प्राधिकरणाने शीव पूर्व आणि पश्चिम भागाला जोडणारा शीव उड्डाणपूल धोकादायक घोषित केला आहे. त्यामुळे, शीव उड्डाणपुलावरून अवजड वाहनांसह २.८० मीटरहून अधिक उंचीच्या वाहनांना वाहतुकीसाठी बंदी घालण्यात आली आहे. तसेच, मोहरमनिमित्त १७ जुलै रोजी वांद्रे, कुर्ला, धारावीसह अन्य भागातून मिरवणुका काढण्यात येणार आहेत. या पार्श्वभूमीवर, संबंधित भागात नागरिकांची मोठी वर्दळ असण्याची शक्यता आहे. त्यामुळे नागरिकांनी या भागातील मार्गांवरून प्रवास करणे टाळावे, असे आवाहन महानगरपालिकेच्या जी उत्तर विभागाकडून करण्यात आले आहे.
मोहरमनिमित्ताने दरवर्षी माहीम रेती बंदर येथे ताजिया विसर्जित करण्यासाठी मिरवणूक काढण्यात येते. या मिरवणुकीमध्ये मोठ्या प्रमाणात नागरिक सहभागी होतात. यंदाही अशा मिरवणुकीचे आयोजन करण्यात आल्याने काही मार्गावर गर्दी होऊ शकते. त्यामुळे, नागरिकांनी बुधवार, १७ जुलै रोजी दुपारी ४ ते गुरूवार, १८ जुलै रोजी पहाटे ४ या कालावधीत जी उत्तर विभागातील टी जंक्शन ते कला नगर, ६० फूट रस्ता, ९० फूट रस्ता, एस. एल. रहेजा मार्ग, माहीम कॉज वे या मार्गावरून प्रवास करणे शक्यतो टाळावे. तसेच, महानगरपालिका, मुंबई पोलीस व वाहतूक पोलीस यांच्याद्वारे देण्यात येणाऱ्या सूचनांचे काटेकोरपणे पालन करावे, असे आवाहन महानगरपालिकेकडून करण्यात आले आहे.
