मुंबई : जी.टी. रुग्णालयात ज्येष्ठ नागरिकांसाठी विशेष बाह्यरुग्ण विभाग

६० वर्षांवरील नागरिकांना साधारणपणे रक्तदाब, मधुमेह, स्मृतीभ्रंश यांसारख्या आजारांचा सामना करावा लागतो. त्याचबरोबर दृष्टी कमी होणे, पोटाचे विकार, हृदय विकार अशा समस्यांनाही त्यांना सामोरे जावे लागते. त्यांना तातडीने उपचार मिळावेत, त्यांच्याकडे डॉक्टरांनी विशेष लक्ष द्यावे यासाठी जी. टी. रुग्णालयात ज्येष्ठ रुग्णांसाठी विशेष बाह्यरुग्ण विभाग सुरू करण्यात आला. बाह्यरुग्ण विभाग क्रमांक ३४ मध्ये आठवड्याच्या प्रत्येक बुधवार आणि शुक्रवारी सकाळी ९ ते दुपारी १ या वेळेत ज्येष्ठ रुग्णांवर उपचार करण्यात येणार आहेत. ज्येष्ठ नागरिकांना चांगली आरोग्य सेवा मिळावी यासाठी या विभागामध्ये तज्ज्ञ डॉक्टरांची नियुक्ती करण्यात आली आहे. तसेच तज्ज्ञ डॉक्टरांचे वेळापत्रकही तयार करण्यात आले आहे. जेणेकरून ज्येष्ठ नागरिकांना डॉक्टर कधी उपलब्ध असतील याची सहज माहिती मिळेल. ज्येष्ठ नागरिकांना सांधेदुखीचा त्रास अधिक असल्याने अन्य डॉक्टरांसोबत अस्थिव्यंग तज्ज्ञही या बाह्यरुग्ण विभागामध्ये उपलब्ध असणार आहेत, अशी माहिती जी. टी. रुग्णालय व शासकीय वैद्यकीय महाविद्यालयाचे अधिष्ठाता डाॅ. जीतेंद्र संकपाळ यांनी दिली.

हेही वाचा – टोरेस घोटाळा प्रकरण : कार्यतत्परतेत पोलिसांकडून कसूर, पोलिसांच्या भूमिकेवर उच्च न्यायालयाचे पुन्हा ताशेरे

हेही वाचा – घर खरेदीदारांसाठी महारेराकडून नव्याने मार्गदर्शक सूचना जारी

ज्येष्ठ नागरिकांसाठी स्वतंत्र खिडकी

ज्येष्ठ नागरिकांसाठी विशेष बाह्यरुग्ण विभाग सुरू करण्याबरोबरच त्यांना नोंदणी करण्यासाठी व औषधे घेण्यासाठी त्रास होऊ नये यासाठी रुग्णालयामध्ये स्वतंत्र औषध व नोंदणी खिडकी सुरू करण्यात आली आहे. परिणामी, ज्येष्ठ नागरिकांना केसपेपर काढण्यासाठी लांब रांगेत उभे राहावे लागणार नाही. ज्येष्ठ नागरिकांच्या नोंदणी खिडकीवर नोंद करण्यात येणाऱ्या रुग्णांसाठी स्वतंत्र नोंदणीपुस्तक ठेवण्यात आले आहे. जेणेकरून या रुग्णांची माहिती सहज उपलब्ध होईल. ज्येष्ठ नागरिकांना उपाचारानंतर सहज औषधे मिळावीत आणि त्यांना औषधांसाठी रांगेत उभे राहावे लागू नये यासाठी स्वतंत्र खिडकी सुरू करण्यात आल्याची माहिती डाॅ. जीतेंद्र संकपाळ यांनी दिली.