एमआयडीसी जमीन घोटाळाप्रकरणी सुभाष देसाईंची चौकशी अप्पर सचिवांमार्फत

एमआयडीसी घोटाळा जाहीर झाल्यानंतर याप्रकरणी चौकशी होणारच हे मुख्यमंत्री देवेंद्र फडणवीस यांनी जाहीर केले होते, त्यानंतर लगेचच सुभाष देसाई यांनी आपल्या मंत्रिपदाचा राजीनामा दिला होता, जो मुख्यमंत्र्यांनी स्वीकारला नाही. १५ ऑगस्टच्या आधीपासूनच एमआयडीसी घोटाळा प्रकरणी सुभाष देसाई यांची चौकशी कोणातर्फे होणार हे स्पष्ट झालेले नव्हते. मात्र अप्पर सचिव के. पी. बक्षी हे त्यांची चौकशी करणार आहेत अशी माहिती समोर आली आहे.

काय आहे प्रकरण?
एमआयडीसीसाठी घेतलेली इगतपुरी जवळची सुमारे ४ हजार कोटींची ४०० एकर जमीन सुभाष देसाई यांनी शिवसेनेच्या जवळच्या विकासकाला दिली असा आरोप त्यांच्यावर विरोधी पक्षनेते धनंजय मुंडे यांनी केला आहे. या प्रकरणी न्यायालयीन चौकशी व्हावी आणि सुभाष देसाई यांनी राजीनामा द्यावा अशी मागणी विरोधकांनी लावून धरली होती. मात्र मुख्यमंत्र्यांनी सुभाष देसाई यांचा राजीनामा स्वीकारलेला नाही.