लाचखोरांवर तात्काळ कारवाईचे मुख्यमंत्र्यांचे आदेश

लाच घेतल्याप्रकरणी न्यायालयाने दोषी ठरवूनही शासकीय सेवेत कार्यरत असणाऱ्या अधिकारी आणि कर्मचाऱ्यावर तात्काळ कारवाई करण्याचे आदेश मुख्यमंत्री देवेंद्र फडणवीस यांनी मंगळवारी दिले.
शासकीय काम करून घेण्यासाठी लाचेची मागणी करणारे व ती घेताना लाचलुचपत प्रतिबंधक विभागाच्या सापळ्यात अडकलेल्या अधिकारी-कर्मचाऱ्यांवर न्यायालयात खटले दाखल करण्यात येतात. याबाबतच्या कार्यवाहीत काही अधिकारी-कर्मचाऱ्यांना न्यायालयाने दोषी ठरवून शिक्षाही ठोठावल्या आहेत. मात्र, त्यातील काही अधिकारी-कर्मचाऱ्यांवर संबंधित विभागाने कोणतीही कारवाई न केल्याने ते अद्यापही शासकीय सेवेत कार्यरत आहेत. याची फडणवीस यांनी गंभीर दखल घेऊन तात्काळ कारवाई करण्याचे आदेश मुख्य सचिव स्वाधीन क्षत्रिय यांना दिले. तसेच या दोषी ठरलेल्या कर्मचाऱ्यांवर कारवाई न होण्यास जबाबदार असलेल्या संबंधित अधिकाऱ्यांकडूनही खुलासे मागविण्यात यावेत, असे आदेशही त्यांनी दिले.