मुंबई : मुंबईकरांना पुरविल्या जाणा-या नागरी सेवा-सुविधांच्या विकासासाठी कर उत्पन्न गरजेचे आहे. महानगरपालिकेचा आर्थिक रोख प्रवाह (कॅश फ्लो) सुरळीत ठेवण्यातही मालमत्ताकराची भूमिका महत्त्वपूर्ण आहे. नागरिकांना मालमत्ताकराची देयके नियमितपणे, वेळेवर मिळावीत, करभरणा प्रक्रिया अधिकाधिक सहजसोपी व सुलभ व्हावी, यासाठी अधिक प्रयत्न करणे गरजेचे आहे, असे मत महानगरपालिका आयुक्त प्रशासक भूषण गगराणी यांनी सोमवारी व्यक्त केले. झोपडपट्टी भागातील व्यावसायिक मालमत्तांचा शोध घेऊन त्यांनाही कराच्या कक्षेत आणावे, अशी सूचना गगराणी यांनी अधिकाऱ्यांना दिली.
भायखळा येथील अण्णा भाऊ साठे सभागृहात महानगरपालिकेच्या करनिर्धारण व संकलन खात्याचे अधिकारी आणि कर्मचा-यांसमवेत गगराणी यांनी सोमवारी संवाद साधला. सध्या महानगरपालिकेच्या करनिर्धारण व संकलन खात्याकडे २ लाख ४३ हजार ९८९ मूळ मालमत्तांची नोंद आहे. त्यात निवासी आणि अनिवासी (व्यावसायिक) मालमत्तांचा समावेश आहे. मालमत्तांचे मूल्यांकन करण्यासाठी महानगरपालिकेने टप्पे निश्चित केले आहेत. त्याची प्रभावीपणे अंमलबजावणी झाली पाहिजे, असेही त्यांनी सांगितले. कर आकारणीमध्ये आवश्यक बदल करण्यासाठी सर्व नवीन बांधकामे, विद्यमान बांधकामे आणि मालमत्तेत बदल असल्यास त्याची माहिती इमारत प्रस्ताव, इमारत व कारखाने विभागाकडून घेतली पाहिजे. त्यासाठी महानगरपालिकेच्या विविध विभागांमध्ये समन्वय साधणे अत्यावश्यक आहे, असे गगराणी यांनी नमूद केले. मालमत्ताकर ऑनलाईन पद्धतीने भरण्याची प्रक्रिया महानगरपालिकेने सुलभ केली असली तरी त्यात आणखी सुधारणा करण्यास वाव आहे. त्यामुळे आणखी सोपे पर्याय महानगरपालिकेने उपलब्ध करून दिले पाहिजेत. नागरिकांना नागरी सुविधा केंद्रावर प्रत्यक्ष जाण्याची आवश्यकता भासणार नाही, अशी यंत्रणा उपलब्ध करून देण्याची सूचना त्यांनी अधिकाऱ्यांना दिली. आर्थिक वर्षाच्या अखेरीस, मालमत्ता कराचे उद्दिष्ट गाठण्यासाठी धावाधाव करण्यापेक्षा आर्थिक वर्षाच्या सुरुवातीलाच कार्यक्रम निश्चित करायला हवा, असेही त्यांनी स्पष्ट केले.
या कार्यक्रमात करनिर्धारण व संकलन खात्याने केलेली कर वसुली, स्थावर व जंगम मालमत्ता जप्ती व अटकावणी कारवाई, कर भरण्यासाठीची जनजागृती, थकीत मालमत्ता कर वसुलीची कार्यवाही, महसूल वाढीचे नवीन स्रोत, कर वसुलीत येणा-या अडचणी कामकाजात सुलभता व सुसूत्रता येण्याकरिता उपाययोजना आदीं विषयांवर चर्चा करण्यात आली. त्यावेळी अतिरिक्त महानगरपालिका आयुक्त अश्विनी जोशी, सहआयुक्त विश्वास शंकरवार, सहायक आयुक्त गजानन बेल्लाळे आदी उपस्थित होते.
