मढ येथे पावसाळ्यापूर्वी बांधण्यात आलेली पर्जन्य जलवाहिनी अवघ्या चार महिन्यात ढासळली असून सिमेंट काँक्रिटची पर्जन्य जलवाहिनी ढासळल्यामुळे संबंधित विभागाला हे बांधकाम तोडून टाकावे लागले आहे. या पर्जन्य जलवाहिनीच्या कामाबाबत प्रश्नचिन्ह उपस्थित झाले असून या प्रकरणी चौकशी करण्याची मागणी होऊ लागली आहे.
मढ परिसरात पावसाचे पाणी वाहून नेण्यासाठी मे २०२२ मध्ये सिमेंट काँक्रिटची पर्जन्य जलवाहिनी नव्याने बांधण्यात आली होती. या वाहिनीचा बराचसा भाग पावसाळ्यात ढासळला. त्यामुळे रहिवाशांनी संताप व्यक्त केला होता. त्यानंतर पर्जन्य जलवाहिनी विभागाने या वाहिनीची दुरुस्ती केली होती. मात्र आता ही पर्जन्य जलवाहिनी पूर्णतः तोडून टाकण्यात येणार आहे.
या प्रकरणात मोठ्या प्रमाणावर पैशांचा अपव्यय झाला असून बांधकामाच्या दर्जावरही प्रश्नचिन्ह उपस्थित झाले आहे. परिणामी, या प्रकरणाची चौकशी करावी, अशी मागणी वाचडॉग फाऊंडेशन या संस्थेने केली आहे. कंत्राटदारावर कारवाई करावी, तसेच त्याची देयके थांबवावी, देयके अदा केली असतील तर पैसे वसूल करावे, अशी मागणी फाउंडेशनचे पिमेंटा गोडफ्रे यांनी केली आहे. तसेच या प्रकरणाची चौकशी करून संबंधितांवर कठोर कारवाई करावी, अशी मागणीही त्यांनी केली आहे.
