मुंबई: रस्त्याने जाणाऱ्या पादचाऱ्यांचे मोबाइल चोरून पळ काढणाऱ्या एका सराईत आरोपीला आरसीएफ पोलिसांनी अटक केली. या आरोपीच्या ताब्यातून पोलिसांनी काही मोबाइल हस्तगत केले असून याप्रकरणी पोलीस अधिक तपास करीत आहेत.
चेंबूर कॅम्प परिसरात राहणारा शिवम तिलारे (२०) हा तरुण सोमवारी रात्री बाजारात जात होता. याच वेळी चोराने त्याच्या हातातील ७० हजार रुपये किमतीचा आयफोन हिसकावून पोबारा केला. याबाबत त्याने आरसीएफ पोलीस ठाण्यात तक्रार दाखल केली. पोलिसांनी गुन्हा दाखल करून तपास सुरू केला.
हेही वाचा… मुंबई : रस्त्यांवरील खड्यात मासे, खेळण्यांतील होड्या सोडून मनसेचे अनोखे आंदोलन
आरसीएफ पोलीस ठाण्याचे सहाय्यक पोलीस निरीक्षक किरण मांढरे यांनी तत्काळ परिसरातील काही सीसी टीव्ही कॅमेऱ्यांतील चित्रणाची तपासणी केली. यावेळी आरोपी कुर्ला परिसरात गेल्याचे निदर्शनास आले. त्यानुसार पोलिसांनी तपास करून आरोपी तुषार नट (२०) याला कुर्ला परिसरातून ताब्यात घेतले. चौकशीअंती तुषारला अटक करण्यात आली.
