मुंबई : पश्चिम रेल्वेवरील चर्चगेट ते मरीन लाईन्सदरम्यान वानखेडे उड्डाणपुलाच्या (उत्तर)च्या मुख्य गर्डरच्या कामासाठी शनिवार मध्यरात्री १:१० ते पहाटे ४:१० वाजेपर्यंत तीन तासांचा ब्लॉक असेल. या कामामुळे काही लोकलच्या वेळेवर परिणाम होणार आहे. तर, काही लोकल मुंबई सेंट्रल-चर्चगेट दरम्यान रद्द केल्या जातील.
शनिवारी विरार-चर्चगेट लोकल विरारहून रात्री ११.३० वाजता सुटेल आणि चर्चगेटला रात्री १.१० वाजता पोहोचेल. ही विरार ते चर्चगेटपर्यंत धावणारी ही शेवटची लोकल असेल. विरार-चर्चगेट लोकल विरारहून रात्री ११.४९ वाजता सुटेल आणि मुंबई सेंट्रलपर्यंत धावेल. विरार-चर्चगेट लोकल विरारहून रात्री १२.०५ वाजता सुटेल आणि मुंबई सेंट्रलपर्यंत धावेल. बोरिवली-चर्चगेट लोकल बोरिवलीहून रात्री १२:१० वाजता निघेल आणि मुंबई सेंट्रलपर्यंत धावेल.
हेही वाचा…सीएसएमटी येथे शुक्रवार-शनिवारी रात्रीकालीन ब्लॉक; लोकल, रेल्वेगाड्यांच्या वेळापत्रकात बदल
बोरिवली-चर्चगेट लोकल बोरिवलीहून रात्री १२:३० वाजता निघेल आणि मुंबई सेंट्रलपर्यंत धावेल. चर्चगेट-विरार लोकल, चर्चगेटहून पहाटे ४.१५ वाजता सुटणारी लोकल मुंबई सेंट्रलवरून पहाटे ४.२५ वाजता सुटेल. चर्चगेट-बोरिवली लोकल चर्चगेट येथून पहाटे ४.१८ वाजता सुटण्याऐवजी मुंबई सेंट्रलवरून पहाटे ४.२८ वाजता सुटेल, अशी माहिती पश्चिम रेल्वे प्रशासनाकडून देण्यात आली.