पतीसोबत अनैतिक संबंध ठेवणाऱ्या तरुणीची हत्या करून तिचा मृतदेह नाल्यात फेकल्याची घटना दोन दिवसांपूर्वी कुर्ला येथे घडली. याबाबत नेहरूनगर पोलिसांनी तपास करून तीन महिलांना अटक केली असून याप्रकरणी पोलीस अधिक तपास करीत आहेत.
हेही वाचा >>>मुंबई : स्वस्तात घरे देण्याचे आमीष दाखवून अडीच कोटी रुपयांची फसवणूक ; ११ जणांविरोधात तक्रार
कुर्ला कसाईवाडा परिसरातील एका नाल्यात एका महिलेचा मृतदेह असल्याची माहिती बुधवारी नेहरू नगर पोलिसांना मिळाली. पोलिसांनी अग्निशमन दलाच्या मदतीने नाल्यातून मृतदेह बाहेर काढला. एका गोणीमध्ये हात-पाय बांधलेल्या अवस्थेत हा मृतदेह होता. पोलिसांनी तत्काळ हत्येचा गुन्हा दाखल करून तपासाला सुरुवात केली. पोलिसांनी या परिसरातील काही सीसी टीव्ही कॅमेरातील चित्रणाची तपासणी केली. यामध्ये एका रिक्षाबद्दल पोलिसांना संशय आला. पोलिसांनी या रिक्षाचा शोध घेतला. रिक्षाचालकाने आरोपी महिलांना कामगार नगर येथून माहुल गाव परिसरात सोडल्याचे पोलिसांना सांगितले.
हेही वाचा >>>बेस्टच्या नोटीसवर कंत्राटदाराचे मौन; मिनी बसची संख्या रोडावली
पोलिसांनी काही दिवस पाळत ठेवून या प्रकरणी मीनल पवार, प्रज्ञा भालेराव आणि शिल्पा पवार या तिघींना कुर्ला परिसरातून ताब्यात घेतले. त्यानंतर त्यांची चौकशी केली असता मीनलच्या पतीचे या तरुणीसोबत अनैतिक संबंध असल्याचे उघड झाले. चार दिवसांपूर्वी या तरुणीला आरोपी महिलेच्या पतीने माहुल गाव परिसरात राहणाऱ्या शिल्पाच्या घरी ठेवले होते. याबाबतची माहिती मिळताच आरोपी महिला तेथे पोहोचली. ती तरुणीला इमारतीच्या छतावर घेऊन गेली आणि तेथे तिची गळा आवळून हत्या केली. त्यानंतर मैत्रीण आणि बहिणीच्या मदतीने तरुणीचा मृतदेह गोणीत भरून कसाईवाड्यातील नाल्यात फेकून दिला. तिन्ही महिलांनी गुन्ह्याची कबुली दिल्यानंतर पोलिसांनी त्यांना अटक केली असून याप्रकरणी पोलीस अधिक तपास करीत आहेत.
