लोकसत्ता प्रतिनिधी
मुंबई : यशवंतराव चव्हाण मुंबई -पुणे द्रुतगती मार्गावर मंगळवार, २३ जानेवारी रोजी दुपारी दोन तासांचा वाहतूक ब्लॉक घेण्यात येणार आहे. या द्रुतगती महामार्गावर दुपारी १२ ते २ दरम्यान हा ब्लॉक घेण्यात येणार आहे.
महाराष्ट्र राज्य रस्ते विकास महामंडळ (एमएसआरडीसी) मंगळवारी दुपारी १२ ते २ या वेळेत हायवे ट्रॅफिक मॅनेजमेंट सिस्टमअंतर्गत मुंबई वाहिनीवर साखळी क्रमांक कि.मी २४.२५० आणि पुणे वाहिनीवर साखळी क्रमांक कि.मी ५६.९०० (कुसगाव वाडी ) येथे गॅन्ट्री उभारण्याचे काम हाती घेणार आहे. या कामादरम्यान वरील भाग वाहतुकीसाठी बंद असणार असून वाहतूक पर्यायी मार्गाने वळविण्यात येणार आहे. पुण्याहून मुंबईकडे जाणारी हलकी वाहने मुंबई वाहिनीवर लेन कि.मी ५५.००० वरून वळवून राष्ट्रीय महामार्ग क्रमांक ४८ जुना पुणे मुंबई महामार्गावरून मार्गस्थ होतील. पुण्याहून मुंबईकडे जाणारी हलकी वाहने आणि बसेस खोपोली एक्झिट कि.मी ३९.८०० येथून वळवून राष्ट्रीय महामार्ग क्रमांक ४८ जुना पुणे मुंबई महामार्गावरून खोपोली शहरातून पुढे शेडुंग टोलनाका मार्गे मुंबई वाहिनीवर मार्गस्थ होतील.
आणखी वाचा-मराठा सर्वेक्षणाचा प्रशासकीय कामांना फटका?
पुण्याहून मुंबईकडे जाणारी हलकी व जड -अवजड वाहने खालापूर टोल नाका, शेवटच्या लेनने खालापूर एक्झिट कि.मी ३२.५०० येथून राष्ट्रीय महामार्ग क्रमांक ४८ जुना पुणे – मुंबई महामार्गावरून खोपोली शहरातून पुढे शेडुंग टोलनाका मार्गे मुंबई वाहिनीवर मार्गस्थ होतील. तर मुंबई- पुणे राष्ट्रीय महामार्ग क्र.४८ या मार्गावरून पुण्याहून मुंबईकडे येणारी वाहने शेडुंग फाट्यावरून सरळ पनवेलच्या दिशेने मार्गस्थ होतील. मुंबईहून पुण्याकडे जाणारी सर्व प्रकारची वाहने किलोमीटर ५४.९०० येथील कुसगाव टोल नाका येथून वळवून राष्ट्रीय महामार्ग क्रमांक ४८ जुना पुणे – मुंबई महामार्गावरून पुण्याकडे वळविण्यात येईल.
