मुंबई : वायव्य मुंबईत तृतीयपंथीही लोकसभेच्या निवडणूकीच्या प्रचारात उतरले आहेत. महायुतीचे उमेदवार शिवसेना शिंदे गटाचे उमेदवार रवींद्र वायकर यांच्या प्रचारासाठी १०० हून अधिक तृतीयपंथी उतरले आहेत. रविवारी १२ मे रोजी दिंडोशी विधानसभेत तृतीयपंथीयांनी घरोघरी जाऊन वायकर यांच्या प्रचाराला सुरूवात केली.
पश्चिम उपनगरात तृतीयपंथीयांची संख्या मोठी असून या समाजातील लोकांचे प्रश्नही अनेक वर्षांपासून सोडवलेले नाहीत. अगदी मूलभूत सुविधांपासून हा वर्ग वंचित आहे. निवडणूकीच्या निमित्ताने या वर्गाने आपल्या समस्या उमेदवारांपर्यंत पोहोचवण्याचे ठरवले आहे. गेल्याच आठवड्यात याच भागातील काही तृतीयपंथी संघटनांनी महाविकास आघाडीचे ठाकरे गटाचे उमेदवार अमोल किर्तीकर यांची भेट घेतली होती व आपल्या समस्या मांडल्या होत्या. तर काही संघटनांनी वायकर यांची भेट घेतली होती. त्यानंतर वायकर यांनी या तृतीयपंथीयांना आपल्या प्रचारात सामावून घेतले आहे. रविवारी तृतीयपंथीयांनी सायंकाळी ५ ते ७ या वेळात क्रांतीनगर, रामलीला मैदान ते इंदिरानगर या भागात वायकरांचा प्रचार केला.
तृतीयपंथीयांसाठी कुठेच शौचालयाची व्यवस्था नसल्याची समस्या काही महिन्यांपूर्वी तृतीयपंथीयांनी वायकर यांच्याकडे मांडली होती. तेव्हा वायकर यांनी तातडीने गोरेगाव (पूर्व) आरे चेक नाका येथे उभारलेल्या उद्यानामध्ये तृतीयपंथीसाठी शौचालय उभारले. त्यामुळे तृतीयपंथीयांनी वायकर यांचा प्रचार करण्याचे ठरवले आहे. महायुतीकडून उमेदवारी जाहीर होताच तृतीयपंथीयांनी रवींद्र वायकर यांची भेट घेतली होती. नुसती भेट न घेता त्यांच्या समवेत काम करण्याची इच्छाही व्यक्त केली होती. त्यानुसारच द्वारकामाई चॅरिटेबल ट्रस्टच्या १०० पेक्षा जास्त तृतीय पंथी, महिला व पुरूष तसेच मुलं आणि मुली असे मिळून सुमारे १००० जण रविवारच्या प्रचारात सहभागी झाले होते.
