‘लोकल’ला लटकून प्रवास करणे धोक्याचेच ; कळव्याजवळील तरुणाच्या अपघाताचा व्हिडीओ व्हायरल

लोहमार्ग पोलिसांनी दिलेल्या माहितीनुसार, दानिश जकिर हुसैन खान हा १८ वर्षीय तरुण कळव्यामध्ये राहतो. तो २३ जूनला सकाळी साडेनऊ वाजता कळवा ते दादर असा प्रवास लोकलच्या मोटरकोच डब्याला लटकून करत होता. त्याच्यासह आणखी दोन प्रवासीही लटकत होते. प्रवासादरम्यान दानिशचा हात सटकला आणि तो रुळाच्या बाजूला पडला. ही सर्व घटना बाजूनेच जाणाऱ्या एका एक्सप्रेसमधील प्रवाशाने मोबाईलमध्ये कैद केली.

या घटनेत दोन अनोळखी इसमांनी घटनास्थळी धाव घेऊन दानिशला त्वरित रुग्णालयात दाखल केले. तरुणाच्या पायाला आणि हाताला जबर मार लागला आहे. हा अपघात स्वतःच्या निष्काळजीपणामुळे झाल्याचे जखमी प्रवाशाने पोलिसांना दिलेल्या जबाबात म्हटले आहे.

‘लोकल’ मधून पडून होणाऱ्या अपघातात वाढ –

लोहमार्ग पोलिसांच्या नोंदीनुसार लोकलमधून पडून तसेच रुळाजवळील खांबाला धडकल्याने झालेल्या अपघातात वाढ झाली आहे. २०२० मध्ये लोकलमधून पडून १७७ जणांचा, तर रुळाजवळील खांब लागल्याने दोघांचा मृत्यू झाला आहे. तर २०२१ मध्ये २७७ जणांचा मृत्यू आणि रुळाजवळील खांबाला आदळून झालेल्या अपघातात सहा जणांचा मृत्यू झाला आहे.