तापमानातील सततच्या चढउतारामुळे स्वाइन फ्लूची साथ अजूनही कमी होत नसून आणखी दोघांचा या आजाराने बळी घेतला. या दोन्ही व्यक्ती वृद्ध होत्या. मुंबईच्या ११ रुग्णांसह शहरातील स्वाइन फ्लूच्या बळींची संख्या ३३ वर गेली आहे.गेल्या २४ तासांत स्वाइन फ्लूचे ४२ रुग्ण आढळून आले. त्यातील १५ जणांना रुग्णालयात दाखल करण्याची वेळ आली असून एकाला कृत्रिम श्वसनयंत्रणेवर ठेवण्यात आले आहे. आतापर्यंत स्वाइन फ्लूचा संसर्ग झालेल्यांची संख्या १२६७ वर गेली आहे. शहराबाहेरून उपचारांसाठी आतापर्यंत १६१ रुग्ण आले. त्यातील २२ जणांचा मृत्यू झाला आहे. बोरिवली येथील ७० वर्षांच्या महिलेचे अपेक्स रुग्णालयात, तर राजस्थान येथील ७२ वर्षांच्या पुरुषाचे मुलुंड येथील श्रद्धा रुग्णालयात मंगळवारी रात्री निधन झाले.
