स्थानकाभोवती भटकंती : उद्यानांचे उपनगर

सद्गुरूची पावभाजी

स्थानकातून बाहेर पडून पुढे गेल्यास वैशाली गार्डन रेस्टॉरंट, सद्गुरू हॉटेल, वाइल्ड ऑर्चिड ही केंद्रे भूक भागवण्यास सक्षम असून डायमंड उद्यानाजवळ फासोस, रिबन्स अ‍ॅण्ड बलुन्ससारखे चांगले पर्यायदेखील उपलब्ध आहेत. सद्गुरू हॉटेलची पावभाजी अवघ्या चेंबूरमध्ये प्रसिद्ध आहे. शिवाय येथे वेगवेगळय़ा प्रकारचे ज्यूसही उपलब्ध आहेत.

युनियन पार्क

डायमंड उद्यानावरून वि. ना. पुरव मार्ग ओलांडून पुढे गेल्यावर ‘द बॉम्बे प्रेसिडेंसी गोल्फ क्लब’ हे अत्यंत जुने ‘गोल्फकोर्स’ लागते. याला युनियन पार्क असेही म्हणतात. १९२७ साली बांधलेला या क्लबचे काही वर्षांपूर्वी नूतनीकरण करण्यात आले. बरेच पैसे वगैरे भरून येथे नोंदणी करता येत असल्याने एखाद्या नवख्याला हे अनुभवयाचे झाल्यास येथे फेरफटका मारण्यास हरकत नाही.

हरित चेंबूर

चेंबूर पूर्वेला बाहेर पडले की, अवघ्या दोनच मिनिटांत डॉ. बाबासाहेब आंबेडकर उद्यान लागते. गोलाकार पसरलेल्या या उद्यानात बाबासाहेबांचा मोठा पुतळा असून क्षणभर विसाव्यासाठी आसन व्यवस्था करण्यात आली आहे. येथून सरळ दुतर्फा असलेल्या वृक्षांच्या सावल्यातून सुखावून पुढे गेल्यावर लंब-गोलाकार पसरलेले डायमंड उद्यान लागते. येथे मुलांची खेळणी, जॉगिंगचे पथ, कारंजी असून हवाई दलाचे जीनॅट-एम के हे लढाऊ विमान प्रदर्शनासाठी ठेवण्यात आले आहे. या दोन्ही उद्यानांमध्ये ‘मेक इन इंडिया’ सप्ताहाचे बोधचिन्ह असलेल्या सिंहाच्या मूर्त्यां कायमस्वरूपी स्थापित करण्यात आल्या आहेत. तसेच आंबेडकर उद्यानापासून काही अंतरावर साण्डू उद्यान लागते. या साण्डू उद्यानाच्या अलीकडेच गांधी मैदान असून येथे बहुतांश क्रीडा प्रकारांचा सराव स्थानिक करतात, तर व्यावसायिक व हौशी पातळीवर खेळणारे अनेक जण हे आपली पसंती चेंबूर जिमखाना व त्याच्या मैदानाला देतात.