मुंबई: श्वानाने केलेल्या हल्ल्यात एका तरूणाचा मृत्यू झाल्याची घटना विक्रोळीत घडली असून सदर तरुण श्वानाचा सांभाळ करण्याचे काम करीत होता. याप्रकरणी पोलीस अधिक तपास करीत आहेत.
विक्रोळी परिसरात वास्तव्यास असलेला असरत अली (२२) हा आठ महिन्यांपूर्वी श्वानांना प्रशिक्षण देणाऱ्या एका कंपनीत नोकरीला लागला होता. तो श्वानांना सांभाळण्याचे काम करीत होता. विक्रोळी परिसरात ग्रेट डेन जातीच्या श्वानाला सांभाळण्याची जबाबदारी त्याच्यावर होती. या श्वानाने सोमवारी त्याच्यावर हल्ला केला. या हल्ल्यात असरत गंभीर जखमी झाला. त्याच्या इतर सहकाऱ्यांनी त्याला तत्काळ घाटकोपरमधील राजावाडी रुग्णालयात दाखल केले. मात्र उपचारापूर्वीच त्याचा मृत्यू झाल्याचे डॉक्टरांनी घोषित केले.असरतच्या एका नातेवाईकाच्या तक्रारीवरून विक्रोळी पोलिसांनी श्वानांना प्रशिक्षण देणाऱ्या कंपनीविरोधात गुन्हा दाखल केला असून याप्रकरणी पोलीस अधिक तपास करीत आहेत.
