विद्यार्थी व शिक्षकांच्या विविध मागण्यांसाठी ‘युवा सेना’ आणि ‘बुक्टु’आक्रमक; मुंबई विद्यापीठाच्या फोर्ट संकुलाबाहेर आंदोलकांना पोलिसांनी घेतले ताब्यात

नादुरुस्त गाड्या भंगारात? विद्यार्थ्यांच्या शुल्कातून घेतलेल्या गाड्या भंगारात, डॉ. बाबासाहेब आंबेडकर आंतरराष्ट्रीय संशोधन केंद्र कधी पूर्ण होणार?, कलिना संकुलाचा झोपडपट्टी विळखा सुटणार का?, ‘एआयटीए’ला दिलेली जागा कधी परत येणार?, पदवी प्रमाणपत्रावरील चुकीबद्दल कारवाई होणार का?, क्रीडा संकुलाची आवश्यक डागडुजी होणार का? जलतरण तलाव परिपूर्ण कधी होणार? ‘एमएमआरडीए’ मुंबई विद्यापीठाला १ हजार २०० कोटी कधी देणार ? असे प्रश्न ‘युवा सेना’ आणि ‘बुक्टु’च्या अधिसभा सदस्यांनी उपस्थित केले आणि सदर मजकूर असलेले फलक हाती घेऊन फोर्ट संकुला बाहेर आंदोलन करण्यात आले. यावेळी अधिसभा सदस्यांनी घोषणाबाजी करून परिसर दणाणून सोडला होता.

‘मुंबई विद्यापीठ प्रशासन पोलिसांच्या मदतीने आंदोलन चिरडण्याचा प्रयत्न करीत आहे. मुंबई विद्यापीठाच्या इतिहासात प्रथमच हा प्रकार घडत आहे. दोन महिन्यांपूर्वी अखिल भारतीय विद्यार्थी परिषदेने कलिना संकुलात दोन दिवस आंदोलन केले. परंतु एकही विद्यापीठ अधिकारी आणि पोलीस त्यांच्या आजुबाजूला फिरकले नाहीत. परंतु फोर्ट संकुलाबाहेरील ‘युवा सेना’ आणि ‘बुक्टु’च्या धरणे आंदोलनाला सर्व आजी – माजी अधिसभा सदस्य असतानाही पोलीस कारवाई करून आझाद मैदान पोलीस ठाण्यात नेण्यात आले. या कारवाईचा आम्ही तीव्र निषेध करीत आहोत’, असे ठाकरे गटाच्या युवा सेनेचे अधिसभा सदस्य प्रदीप सावंत यांनी सांगितले.

आंदोलनाच्या पूर्वपरवानगीसंदर्भातील परिपत्रक रद्द करा

मुंबई विद्यापीठाच्या परिसरात कोणत्याही संघटनेस किंवा व्यक्तीस कोणत्याही स्वरुपाच्या सभा, आंदोलने, मोर्चा, उपोषण, निषेध मोर्चा, बैठका व तत्सम कोणत्याही कार्यक्रमाचे पूर्वपरवानगीशिवाय आयोजन करता येणार नाही, असा निर्णय मुंबई विद्यापीठाच्या व्यवस्थापन परिषदेच्या बैठकीत सप्टेंबर २०२४ मध्ये घेण्यात आला होता. या निर्णयामुळे विद्यार्थ्यांचा आवाज दाबला जात असून अभिव्यक्ती स्वातंत्र्यावर निर्बंध आणण्याचा प्रकार आहे, त्यामुळे आंदोलनाच्या पूर्वपरवानगीसंदर्भातील परिपत्रक तात्काळ रद्द करावे, अशी मागणीही ‘युवा सेना’ आणि ‘बुक्टु’च्या सदस्यांनी यावेळी केली.