एप्रिलपासून मुंबईत शून्य औषध चिठ्ठी योजना; मुंबईकरांना मिळणार मोफत वैद्यकीय उपचार, मुख्यमंत्री यांची आपला दवाखान्याला अचानक भेट

हेही वाचा >>> मुंबई : डी. एन. नगरमधील अष्टविनायक गृहप्रकल्पाचा मार्ग मोकळा, १९ वर्षांपासून सुरू होता पुनर्विकास

वरळीतील अभियांत्रिकी संकुलातील हिंदुहृदयसम्राट बाळासाहेब ठाकरे आपला दवाखान्याला मुख्यमंत्री एकनाथ शिंदे यांनी गुरुवारी सकाळी ११.३० च्या सुमारास अचानक भेट दिली. त्यावेळी ते बोलत होते. मुंबईकरांना उपचारासाठी घराजवळच सोय व्हावी या संकल्पनेतून मुंबईत २२६ ठिकाणी आपला दवाखाना सुरू करण्यात आले आहेत. आतापर्यंत ४२ लाख नागरिकांनी त्याचा लाभ घेतला आहे. आपला दवाखानामध्ये रुग्णांना मोफत उपचार मिळत असल्याचे मुख्यमंत्री एकनाथ शिंदे यांनी सांगितले. तसेच मुंबईत आरोग्य आपल्या दारी मोहिमेतून घरोघरी जाऊन नागरिकांची वैद्यकीय तपासणी करण्यात येणार आहे.

हेही वाचा >>> मुंबई : कर्जत, कसारा, बदलापूरातून सुटणाऱ्या रेल्वेगाड्या कायम उशिरा का असतात? प्रवाशांचा संतप्त सवाल

शून्य औषध चिठ्ठी योजनेची एप्रिलपासून अमलबजावणी करण्यात येणार आहे. त्यासाठी १५०० कोटी रुपयांची तरतूद करण्यात आल्याची माहिती मुख्यमंत्र्यांनी यावेळी दिली. मुख्यमंत्री एकनाथ शिंदे यांनी यावेळी दवाखान्यातील साठवणूक कक्ष, औषध कक्ष, तपासणी खोली, स्वच्छ्तागृह यांची पाहणी केली. यावेळी तेथे तपासणीसाठी आलेल्या काही ज्येष्ठ नागरिकांशी मुख्यमंत्र्यांनी संवाद साधून आपल्या दवाखान्याविषयी अनुभव विचारला. रुग्णांच्या चेहऱ्यावर समाधान दिसून आल्याचे मुख्यमंत्र्यांनी सांगितले. यावेळी मुंबई शहर पालक मंत्री दीपक केसरकर, मुंबई उपनगर पालकमंत्री मंगलप्रभात लोढा, मुंबई महापालिका आयुक्त इक्बाल सिंह चहल, अतिरिक्त आयुक्त पी. वेलारासू, डॉ. सुधाकर शिंदे आदी उपस्थित होते.