अमरावती : तिकीट साठ्यात तफावत दिसून आल्यानंतर या प्रकरणी प्राथमिक चौकशी अहवालात दोषी आढळल्याने राज्‍य परिवहन महामंडळाच्या ११ अधिकारी आणि कर्मचाऱ्यांना निलंबित करण्यात आले आहे. या कारवाईमुळे एसटी महामंडळात खळबळ उडाली आहे.एसटी महामंडळाच्या अमरावती आगारात सन २०१९ ते २०२२ या कालावधीत प्रवाशाच्या तिकीट साठ्यामध्ये तफावत आढळून आली होती. या प्रकरणी विभाग नियंत्रकांनी चौकशीचे आदेश दिले होते. यानुसार विभागीय वाहतूक व लेखाअधिकारी यांच्या पथकाने या प्रकरणाची प्राथमिक चौकशी करून याबाबतचा अहवाल आगार व्यवस्थापकांना सादर केला.
त्यानुसार तिकीट साठा अद्ययावत न ठेवता या कामात हलगर्जीपणा केल्याचा ठपका ठेवून सहायक वाहतूक अधिकारी, तत्कालीन आगार लेखापाल यांच्यासह सहा लिपिक, ३ वाहतूक नियंत्रक अशा अमरावती आगारातील ११ अधिकारी व कर्मचाऱ्यांवर निलंबनाची कारवाई करण्यात आली आहे. एसटी महामंडळाचे उपमहाव्यवस्थापक, विभाग नियंत्रक आदी वरिष्ठ अधिकाऱ्यांनी ही कारवाई केली आहे.
