सचिवांच्या नातेवाईकाला पावणेदोन कोटींचे कंत्राट! शाहू महाराज जयंतीचा नियोजित कार्यक्रम असतानाही तातडीची निविदा

नागपूर : डॉ. बाबासाहेब आंबेडकर संशोधन व प्रशिक्षण संस्थेने (बार्टी) छत्रपती शाहू महाराज यांच्या १५० व्या जयंतीनिमित्त ‘सामाजिक न्याय दिन संमेलन सप्ताह’ या नियोजित कार्यक्रमासाठी तातडीची निविदा प्रक्रिया (शॉर्ट टेंडरिंग) राबवून १ कोटी ६२ लाखांचे कंत्राट खासगी कंपनीला दिले. या कंपनीच्या नावाने कंत्राट घेऊन सामाजिक न्याय विभागाचे सचिव सुमंत भांगे यांच्या एका नातेवाईकाने उपकंत्राटदार म्हणून कोल्हापूरचा संपूर्ण कार्यक्रम स्वत: केला. ‘बार्टी’कडून जयंतीच्या नावावर थातूरमातूर कार्यक्रम घेऊन एका खासगी कंपनीला लाभ पोहचवल्याचा आरोप होत आहे.