लोकसत्ता टीम
गोंदिया: येत्या २८ व ३० एप्रिल रोजी गोंदिया जिल्ह्यातील सात कृषी उत्पन्न बाजार समितीची सार्वत्रिक निवडणूक होत आहे. निवडणूक कार्यक्रमानुसार २० एप्रिल हा अर्ज मागे घेण्याचा शेवटचा दिवस होता.
दुपारी ३ वाजेनंतर सातही कृषी उत्पन्न बाजार समितीच्या रणांगणाचे चित्र स्पष्ट झाले आहे. देवरी वगळता ६ कृषी उत्पन्न बाजार समितीची निवडणूक चुरसीची होणार हे दिसून येत आहे. ७ कृषी उत्पन्न बाजार समितीच्या एकूण १२६ संचालक पदाच्या जागांसाठी रिंगणात २४१ उमेदवार शिल्लक राहिले आहेत. जिल्ह्यात मागील २० दिवसांपासून कृषी उत्पन्न बाजार समितीच्या निवडणुकीचे वारे वाहू लागले आहेत.
नामांकन अर्ज दाखल व छाणणी प्रक्रियेनंतर अर्ज मागे घेण्याच्या शेवटच्या क्षणाकडे जिल्ह्याचे लक्ष लागले आहे. २० एप्रिल रोजी दुपारी ३ वाजेपर्यंत नामांकन अर्ज मागे घेण्यात आले. त्यामुळे सातही कृषी उत्पन्न बाजार समितीच्या रणसंग्रामाचे चित्रही स्पष्ट झाले आहे. देवरी कृषी उत्पन्न बाजार समितीच्या रिंगणात संचालक पदाऐवढेच नामांकन अर्ज शिल्लक राहिल्यामुळे तेथील सर्व उमेदवारांची अविरोध निवड निश्चित झाली आहे.
हेही वाचा… नागपूर : मेडिकलमध्ये रुग्णाच्या नातेवाईकांची खासगी सुरक्षा रक्षकाला मारहाण
तर इतर ६ ठिकाणी निवडणूक होण्याचे चित्र स्पष्ट झाले आहे. गोंदिया कृषी उत्पन्न बाजार समितीच्या रिंगणात एकूण ४४ उमेदवार आहेत तर अर्जुनी मोरगाव-३८, आमगाव-३९, सडक अर्जुनी-३१, गोरेगाव-३१, तिरोडा कृषी उत्पन्न बाजार समितीच्या रिंगणात ४० उमेदवार भाग्य आजमावित आहेत.
आमगाव व तिरोडा येथील चुरसीची लढत
तिरोडा कृषी उत्पन्न बाजार समितीच्या रिंगणात एकूण ८१ उमेदवारांचे नामांकन कायम होते. त्यातील ४१ उमेदवारांनी रिंगणातून माघार घेतली. त्यामुळे ४० उमेदवार रिंगणात भाग्य आजमावित आहेत. त्याच प्रमाणे आमगाव येथील कृषी उत्पन्न बाजार समितीच्या रिंगणात एकूण १०६ उमेदवारांचे नामांकन पात्र ठरले होते. त्यातील ६७ उमेदवारांनी उमेदवारी मागे घेतली. त्यामुळे ३९ उमेदवार रिंगणात भाग्य आजमावत आहेत.
