महेश बोकडे
नागपूर : राज्यात १ जानेवारी ते ३१ जुलै २०२३ या सात महिन्यांत दिवसाला ९३ अपघात घडले असून यात रोज ४२ नागरिकांचा मृत्यू तर ७८ जण जखमी झाले. परिवहन खात्याच्या नवीन अहवालातून ही माहिती पुढे आली आहे. या अहवालानुसार, राज्यात गेल्यावर्षी १ जानेवारी ते ३१ जुलै दरम्यान सात महिन्यांत एकूण १९ हजार ८६५ अपघातात ९ हजार २९२ मृत्यू तर १६ हजार १५४ नागरिक जखमी झाले होते. ही संख्या २०२३ मध्ये याच कालावधीत १९ हजार ७१९ अपघातात ८ हजार ९०७ मृत्यू तर १६ हजार ६५३ जखमी इतकी नोंदवली गेली. त्यामुळे गेल्यावर्षीच्या तुलनेत यावर्षी सात महिन्यात राज्यात अपघातांची संख्या व मृत्यू किरकोळ कमी झाल्याचे पुढे आले आहे. परंतु अपघाती जखमींमध्ये मात्र वाढ नोंदवण्यात आली आहे.
बुलढाणा, ठाण्यात अपघात वाढले, मुंबईत घट
बुलढाणा जिल्ह्यात १ जानेवारी ते ३१ जुलै दरम्यान सात महिन्यांत गेल्यावर्षीहून यंदा अपघाताची संख्या ७ ने वाढली. या अपघातात १८ मृत्यू तर ३० जखमी नोंदवले गेले. समृद्धी महामार्गावर अपघात वाढल्याने ही संख्या वाढली आहे. ठाण्यात अपघातांची संख्या नऊने कमी झाली, परंतु मृत्यू ७ तर जखमींची संख्या ३ ने वाढली. मुंबई शहरात अपघाताची संख्या ५२ ने कमी होऊन मृत्यू ३०, जखमींची संख्या ४८ ने कमी झाली. पुणे शहरात अपघाताची संख्या ४३ ने वाढून मृत्यू ८ तर जखमी ४३ ने वाढले. नागपूर शहरात अपघात ९ ने वाढून मृत्यू १२, जखमींची संख्या ५ ने वाढली आहे.
‘‘समृद्धी महामार्गावर खासगी बस जळून प्रवाशांचा मृत्यू झाल्याने तेथे अपघाती मृत्यूंची संख्या जास्त दिसत आहे. परिवहन खात्याने कारवाईसह जनजागृती मोहीम राबवल्याने गेल्यावर्षीहून अपघात कमी झाले आहेत. ही कारवाई आणखी प्रभावी केली जाईल.’’ – विवेक भिमनवार, परिवहन आयुक्त, मुंबई.
