पुणे-अमरावती आणि मुंबई-बल्‍लारशाह या मार्गावर रेल्वेने प्रवास करणाऱ्यांसाठी आनंदाची बातमी आहे. मध्य रेल्वेने या मार्गावरून धावणाऱ्यादोन विशेष रेल्वेगाड्यांना मुदतवाढ देण्‍यासोबतच या गाड्यांच्‍या तब्‍बल ४२ फेऱ्या वाढविण्‍यात आल्‍या आहेत.
हेही वाचा >>> अमरावती : दिल्लीतून चोरलेल्या कारवर सांगलीच्‍या वाहनाचा क्रमांक, ई-चलान प्रणालीमुळे उलगडा
नोकरी, व्‍यवसायाच्‍या निमित्‍ताने अनेक वैदर्भीय पुणे येथे स्‍थायिक झाले आहेत. पुणे आणि अमरावती या मार्गावर रेल्वे गाड्यांमध्ये प्रवाशांची वाढलेली गर्दी लक्षात घेत मध्य रेल्वेने ०१४३९ पुणे-अमरावती आणि ०१४४० अमरावती-पुणे या द्वि साप्‍ताहिक विशेष रेल्वेगाड्यांना नियोजित मुदतीनंतरही चालविण्याचा निर्णय घेतला आहे. पुणे-अमरावती एक्‍स्‍प्रेस २९ सप्‍टेंबरपर्यंत चालणार होती, ती आता १७ नोव्‍हेंबरपर्यंत धावणार आहे. या कालावधीत या विशेष एक्‍स्‍प्रेसच्‍या १४ फेऱ्या वाढविण्‍यात आल्‍या आहेत. अमरावती-पुणे एक्‍स्‍प्रेस ३० सप्‍टेंबरपर्यंत चालणार होती, ती आता १८ नोव्‍हेंबरपर्यंत धावणार असून याही गाडीच्‍या १४ फेऱ्या वाढविण्‍यात आल्‍या आहेत.
हेही वाचा >>> रावणपुत्र मेघनाथाची एक नाही तर दोन-दोन मंदिरे; लोक म्हणतात, “नवसाला पावणारा…”
याशिवाय ०११२७ लोकमान्‍य टिळक टर्मिनस-बल्‍लारशाह साप्‍ताहिक विशेष एक्‍स्‍प्रेसच्‍या फेऱ्यांमध्‍येही वाढ करण्‍यात आली आहे. ही एक्‍स्‍प्रेस २६ सप्‍टेंबरपर्यंत चालणार होती. ती आता १४ नोव्‍हेंबरपर्यंत धावणार आहे. या गाडीच्‍या सात फेऱ्या वाढल्‍या आहेत. ०११२८ बल्‍लारशाह-लोकमान्‍य टिळक टर्मिनस २७ सप्‍टेंबरपर्यंत चालणार होती, ती आता १५ नोव्‍हेंबरपर्यंत धावणार आहे. या विशेष रेल्‍वेगाड्यांसाठी आरक्षणाची सुविधा ३० सप्‍टेंबरपासून सुरू करण्‍यात येणार आहे.
