बुलढाण्यात परिचारिकेवर अत्याचार; बदनामीची धमकी देत…

पीडित नर्स बुलडाणा शहरातीलच राहणारी आहे. ती आणि आरोपी विशाल २०२१ मध्ये शहरातील जांभरुन मार्गावरील एका खासगी रुग्णालयात  नोकरीला होते. तिथेच दोघांची ओळख आणि त्यातून मैत्री  झाली. त्यानंतर दोघांचे एकमेकांच्या घरी येणे जाणे देखील सुरू झाले. पुढील काळात विशालने तिच्या इच्छेविरुद्ध तिच्याशी शारीरिक संबंध प्रस्थापित केले. वेगवेगळ्या खासगी रुग्णलयात काम करीत असलेल्या पीडितेचा त्याने पिच्छाच पुरविला.

हेही वाचा >>>धावत्या रेल्वेत पोलीस हवालदारांनी केला महिला पोलीस कर्मचाऱ्यांचा विनयभंग

आरोपी विशाल तिला बदनामीची धमकी आणि तिच्या मुलांची हत्या करण्याची धमकी देऊ लागला. वारंवार विशालने त्याची शारीरिक भूक भागवली.  तक्रारीवरून पोलिसांनी आरोपी विशालविरुद्ध अनुसूचित जाती-जमाती अत्याचार प्रतिबंध कायद्याच्या विविध कलमांसह भारतीय दंड विधानाच्या  कलम ३७६, ३७६(२)( एम), ३२३, ५०४, ५०६ नुसार गुन्हा दाखल केला आहे. उपविभागीय पोलीस पोलीस  अधिकारी  सुधीर पाटील पुढील तपास करीत आहेत.

महिलांवरील अत्याचारांच्या घटनांमध्ये वाढ

दरम्यान, महिलांवरील अत्याचारांच्या घटनांमध्ये अलीकडे वाढ झाल्याचे दुर्देवी चित्र आहे. कामाच्या ठिकाणी झालेल्या ओळखीचा गैरफायदा घेऊन महिलांना भावनिक करून त्यांचे शारीरिक शोषण कसे करण्यात येते याचे ही घटना उदाहरण आहे. शारीरिक अत्याचाराला बळी पडलेल्या महिलेला मागील संबंधावरून धमकावत आणि ‘ब्लॅकमेल’ करून नराधम कसा गैरफायदा घेतात हे या घटनेवरून दिसून येते. यामुळे कामावरील महिलांनी अशा नराधमांकडून सावध राहणे, दोन हात दूर राहणे काळाची गरज आहे. दुसरीकडे एका हतबल महिलेचे आयुष्य नासविणाऱ्या आरोपी विशाल बोराडे याच्या विरुद्धचा तपास लवकरात लवकर पूर्ण करावा. तसेच विशाल याला कठोर शिक्षा होईल यादृष्टीने तपास करण्याची मागणी नागरिकांतून होत आहे