बुलढाणा: अपुरा पाऊस, मागील पंधरा दिवसांपासून वरुण राजाने मारलेली दडी अन यावर कळस म्हणजे हुमणी अळीचा झालेला भीषण प्रकोप यामुळे निराश झालेल्या शेतकऱ्याने दोन एकरातील सोयाबीनवर ट्रॅक्टर फिरवला. वाढ खुंटलेल्या अळीग्रस्त सोयाबीनमध्ये त्याने जनावरे चरण्यास सोडली आहे.
खामगाव तालुक्यातील आंबेटाकळी येथील श्रीकृष्ण कवळकार या अल्पभूधारक शेतकऱ्याने वैफल्यग्रस्त होऊन आज दुपारी हे पाऊल उचलले. पावसाची सुरुवातीपासून अवकृपा, त्यातच मागील किमान पंधरा दिवसांपासून दिलेली उघडीप, पाऊस न येण्याची चिन्हे यामुळे ते निराश झाले होते. हे कमी म्हणून की काय, शेतातील सोयाबीन पिकावर मोठ्या प्रमाणात हुमणी अळीचा प्रादुर्भाव झाला. यामुळे पावसाभावी वाढ खुंटलेले सोयाबीन पीक वाळत होते. त्यामुळे श्रीकृष्ण कवळकार या अल्पभूधारक शेतकऱ्याने आपल्या शेतातील उभ्या सोयाबीन पिकावर ट्रॅक्टर फिरवून या पिकात जनावरे घातली.
हुमणी अळीचा प्रादुर्भाव झाल्यानंतर अनेकदा फवारण्या करूनही अळी आटोक्यात आली नाही. यामुळे छातीवर दगड ठेवून हे पीक उपटून फेकल्याचे कवळकार यांनी सांगितले.
