बुलढाणा : मेहकर तालुक्यातील सोनाटी येथे शेतीच्या वादातून दोघा बापलेकाची हत्या करण्यात आली होती. या हत्येप्रकरणी दोघा आरोपींना मेहकर न्यायालयाने जन्मठेपेची शिक्षा ठोठावली आहे. न्यायाधीश एस. एम. चंदगडे यांनी दोघा आरोपींना कठोर शिक्षा सुनावली असून तीघांची पुराव्याभावी सुटका करण्याचे आदेश दिले आहे.
फिर्यादी जयश्री अशोक सोनटक्के (सोनाटी , तालुका मेहकर) यांचे सासरे दिगंबर सोनटक्के आणि पती अशोक सोनटक्के हे ११ एप्रिल २०१९ रोजी सोनाटी येथील शेतात ट्रॅक्टरने नांगरणी करत होते. दरम्यान, बबन वैजिनाथ सोनटक्के, प्रकाश वैजिनाथ सोनटक्के, नंदा बबन सोनटक्के, चंद्रकला प्रकाश सोनटक्के, संदिप प्रकाश सोनटक्के यांनी कुऱ्हाड आणि लाठीने त्यांचे सासरे व पतीस मारहाण केली. दिगंबर सोनटक्के व अशोक सोनटक्के यांना जखमी अवस्थेत मेहकर येथे रुग्णालयात भरती केले असता डॉक्टरांनी त्यांना मृत घोषित केले.
हेही वाचा – “मी मुख्यमंत्र्यांविरोधात ठाण्यातून लढण्यास तयार”, आदित्य ठाकरेंचे आव्हान, म्हणाले…
गुन्हा दाखल झाल्यावर उपविभागीय पोलीस अधिकारी रामेश्वर व्यंजने यांनी तपास अंती न्यायालयात दोषारोपपत्र दाखल केले. सरकारी वकील जे. एम बोदडे यांनी अकरा साक्षीदार तपासले. जयश्री सोनटक्के या प्रत्यक्षदर्शी साक्षीदार होत्या. साक्षीपुरावे, अ‍ॅड. बोदडे व आरोपींच्या वकिलाने केलेला युक्तिवाद लक्षात घेता न्यायधीश एस एम चंदगडे यांनी निकाल दिला. आरोपी बबन वैजिनाथ सोनटक्के आणि प्रकाश वैजिनाथ सोनटक्के यांना जन्मठेपेची शिक्षा व प्रत्येकी दहा हजार रुपये दंड ठोठावला. नंदा सोनटक्के, चंद्रकला सोनटक्के, संदिप सोनटक्के यांची निर्दोष मुक्तता केली आहे.
