बुलढाणा : मेहकर येथून चोरीस गेलेले मालवाहक वाहन (ट्रक) हस्तगत करण्यात पोलीस विभागाला यश मिळाले आहे. ही अवजड चोरी करणाऱ्या संभाजीनगर येथील सहा जणांच्या टोळीला जेरबंद करण्यात आले आहे.
मेहकर येथील वरद पेट्रोलपंपमध्ये पार्किंग केलेला ट्रक २४ ऑक्टोबरच्या मध्यरात्रीला अज्ञात चोरट्यांनी चोरून नेला. या अवजड चोरीमुळे खळबळ उडाली होती. फैजल शाह यांनी फिर्याद दिली. मेहकर पोलिसांसमोर तपासाचे आव्हान उभे ठाकले होते.
हेही वाचा – बुलढाणा, नागपूर जिल्ह्यात सर्वाधिक वीज देयकांची थकबाकी
पोलीस अधीक्षक सुनील कडासने यांनी स्थानिक गुन्हे शाखा व मेहकर पोलिसांचे संयुक्त तपास पथक गठीत केले. स्थानिक गुन्हे शाखेचे पोलीस निरीक्षक अशोक लांडे व मेहकरचे ठाणेदार राजेश शिंगटे यांनी तपासाची चक्रे फिरविली.
हेही वाचा – वर्धा : पोषण आहार आता बचत गटाकडे
जिल्ह्यातील व पर जिल्ह्यातील गुन्हेगारांचे ‘रेकॉर्ड’ तपासले. तसेच अन्य माहितीचा आधार घेण्यात आला. या परिणामी संभाजीनगरच्या टोळीला पथकाने जेरबंद केले. यामध्ये अकबर शहा, सैय्यद समीर, सैय्यद सिकंदर, सैय्यद जुनेद, इरफान खान, सादिक शेख यांचा समावेश आहे. टोळीकडून ट्रक व एक वाहन जप्त करण्यात आले.
