नागपूर : भरधाव ट्रकने ट्रिपल सीट जाणाऱ्या दुचाकीला जबर धडक दिली. या अपघातात दोन महिलांसह दुचाकीचालक युवक ठार झाला. हा अपघात बुधवारी सकाळी साडेनऊ वाजता कोंढाळीजवळ घडला. रोशन निळकंठ सहारे (२५), सुषमा उमेश वाघाडे (२८) आणि प्रतीक्षा राजेंद्र वाघाडे (२२) अशी अपघातात ठार झालेल्यांची नावे आहेत.
पोलिसांनी दिलेल्या माहितीनुसार, रोशन सहारे हा दुचाकीवर प्रतीक्षा आणि सुषमा यांना घेऊन चमेली गावावरून शिवा गावाला जात होता. सकाळी साडेनऊ वाजताच्या सुमारास नागपूर अमरावती राष्ट्रीय महामार्गावरील चाकडोह गावाजवळून शिवा गावाकडे जाणाऱ्या वळणार मागून भरधाव आलेल्या ट्रकने दुचाकीला जबर धडक दिली.
हेही वाचा – नागपूर : बार्टी, महाज्योती, सारथीच्या स्वायत्ततेवर गदा?
या धडकेत तिघेही गंभीर जखमी झाले. तिघांना रुग्णवाहिकेतून नागपुरातील शासकीय रुग्णालयात दाखल करण्यात आले. मात्र, उपचारादरम्यान तिघांचाही मृत्यू झाला.
