नागपूर: दिवाळीच्या सुट्यात मावशीकडे पाहुणे म्हणून आलेल्या चिमुकल्या बहिण-भावाच्या अंगावर लोखंडी दरवाजा पडला. यामध्ये तीन वर्षीय चिमुकलीचा गंभीर जखमी होऊन मृत्यू झाला. ही दुर्दैवी घटना कोराडी पोलीस ठाण्याच्या हद्दीत घटना घडली. यज्ञा शरद भाजीखाये (३, गिदमड, आडेगाव, हिंगणा) असे मृत चिमुकलीचे नाव आहे तर कौस्तुभ (५) असे जखमी भावाचे नाव आहे.
बोखारा येथील बजरंग नगरातील साईप्रसाद सोसायटी येथे शरद भाजीखाये यांचे साळभाऊ मनोज प्रल्हाद गजभिये (५५) हे राहतात. दिवाळीच्या सुट्या असल्यामुळे यज्ञा आणि कौस्तुभ हे मावशीकडे बोखारा येथे आले होते. मावशीच्या घरी नवीन स्लायडर गेटचे काम सुरू होते. त्यासाठी लोखंडी गेट ठेवले होते. मंगळवारी सायंकाळी यज्ञा व कौस्तुभ हे दोघेही अंगणात खेळत होते. खेळताना त्यांच्या अंगावर लोखंडी गेट पडले. गेटचे वजन खूप जास्त असल्याने दोघेही खाली दबले. मुलांचा ओरडण्याचा आवाज ऐकून त्यांची आई, मावशी व इतर नातेवाईक धावत बाहेर आले.
दोन्ही चिमुकल्यांना जखमी अवस्थेत पाहून त्यांच्या गोंधळ उडाला. त्यांनी गेट बाजुला गेले. यज्ञाच्या डोक्याला जबर मार बसला होता, तर कौस्तुभदेखील जखमी झाला होता. यज्ञाला उपचारासाठी एका खाजगी रुग्णालयात नेले असता उपचारादरम्यान तिचा मृत्यू झाला. गजभिये यांनी दिलेल्या सूचनेनुसार कोराडी पोलीस ठाण्यात अकस्मात मृत्यूची नोंद केली.
