बुलढाणा : जिल्ह्यातील जळगाव जामोद येथून पुण्याकडे जाणारी खाजगी ट्रॅव्हल बस पुलावरून पैनगंगा नदी पात्रात कोसळल्याने एक महिला ठार, तर २० प्रवासी जखमी झाले. ९ मे च्या मध्यरात्रीनंतर खामगाव ते चिखली दरम्यानच्या पेठ गावाजवळ ही दुर्घटना घडली. या अपघातात संगीता निवृत्ती ठाकरे (४१ वर्षे) यांचा जागीच मृत्यू झाला. अमडापूर व चिखली पोलिसांनी घटनास्थळी धाव घेत जखमींना नजीकच्या रुग्णालयात भरती केले. काहीजणांना रात्री उशिरा बुलढाणा येथील जिल्हा सामान्य रुग्णालयात दाखल करण्यात आले.
