लोकसत्ता प्रतिनिधी यवतमाळ: शेतातील कामे आटोपून बैलगाडीने घरी परतताना अचानक वीज पडून एका महिलेचा मृत्यू झाला. ही घटना मारेगाव तालुक्यातील गोरज शिवारात सोमवारी दुपारी घडली. सुवर्णा संजय कांबळे, (३२) असे मृत महिलेचे नाव आहे. महिला तिचा पती आणि एका मजुरासोबत शेतात गेली होती. दुपारी २ वाजताच्या सुमारास कामे आटोपून ते सर्व बैलगाडीने घरी परत येत असताना गोरज फाट्याजवळ त्यांच्या बैलगाडीवर वीज कोसळली. यात महिला जागेवरच मृत्यूमुखी पडली तर पती आणि सोबत असलेला शेतमजूर बेशुद्ध पडले. बैलही जखमी होऊन खाली पडलेला होता. हेही वाचा. राज्यातील वीज ग्राहकांना दिलासा, दोन दिवसांपासून भारनियमन नाही घटनेची माहिती मिळताच मारेगाव पोलीस घटनास्थळी दाखल झाले. रविवारपासून तालुक्यात पावसाने दमदार हजेरी लावली आहे. पावसासोबत विजांचाही धुमाकूळ सुरु आहे.
