चंद्रपूर: राजुरा शहरालगत असलेल्या रामपुर वस्ती वॉर्ड क्रमांक दोन साई मंदिर येथील रहिवासी संदीप देवराव निमकर (वय २८) या युवकाची रामपुरच्या जंगलात अज्ञात व्यक्तींनी दगडाने ठेचून निर्घृण हत्या केल्याने खळबळ उडाली आहे. ही घटना मंगळवारी रात्री उशिरा उघडकीस आली. संदीप निमकर हा युवक आई वडिलांसह राहत होता. संदीप सोमवार ९ ऑक्टोंबरच्या रात्री आठ वाजता घरून निघून गेला. तेव्हापासून तो बेपत्ता असल्याची तक्रार कुटुंबीयांनी पोलिस ठाण्यात दिली होती. तोपर्यंत नातेवाईकांनी त्याचा सर्वत्र शोध घेतला.
मित्रांसोबत जात असलेल्या ठिकाणी नातेवाईक शोधत असताना रामपुर लगतच्या जंगलात माथरा रोड जवळ शोध घेत असताना झुडपात छिन्नविछिन्न अवस्थेत मृतदेह पडलेला दिसून आला. घटनेची माहिती राजुरा पोलिस यांना दिली. ठाणेदार योगेश पारधी यांनी घटनास्थळ गाठून पंचनामा केला. यावेळी यावेळी अप्पर जिल्हा पोलीस अधीक्षक रीना जनबंधू, उपविभागीय पोलिस अधिकारी दिनेश साखरे उपस्थित राहून घटनेचा पंचनामा करून समोरील तपास राजुरा पोलिस करीत आहे.
